Өңір өнерін өрістеткен байқау

Еліміз өзінің тарихи дамуының жаңа кезеңіне аяқ басты. Бұл – әлеуметтік – экономикалық өркендеуден өзге, мәні әлдеқайда тереңде жатқан өзгеріс. Елбасының болашаққа көрсеткен бағдарын бағамға ала отырып, жаңаша рухани өрлеудің өрісіне қанат жайдық. Осы жолда көптеген жұмыстар атқарылып, түрлі шаралар жүзеге асуда. Соның бірі – ауылдық мәдениет үйлері арасында өткеноблыстық «Ауылым – алтын бесігім» атты байқау. Елді мекендердегі өнер ордаларының материалдық – техникалық базасын нығайтуды, құжат айналымын жүйелеуді, жаңа есімдерді анықтауды мақсат тұтқан бәсекеде 40 – қа жуықмәдениет үйібақтарын сынапты.Арнайы құрылған комиссия І кезеңде тақырып аясында ұйымдастырылған көрмені тамашаласа, ІІ кезеңде мәдени ошақтың қазіргі жағдайын, безендірілуін, материалдық – техникалық базасын сарапқа салды, ал соңғы айналымда өңір өнерпаздарының концерттік бағдарламасына баға берді.

Аталмышбайқауға ауданымыздан Жыланды және Лепсі ауылының мәдениет үйлері қатысқан болатын. Екі мекеме де бүгінгі күні күрделі жөндеуден өткен, заманауи құрылғылармен жабдықталған, штаттық бірлікпен толық қамтылған.

Шілдеден қазанға дейін жалғасқан доданың қорытындысы 19 қазанда Талдықорған қаласындағы І.Жансүгіров атындағы мәдениет сарайында өткен жиында жарияланды. Облыс әкімі А.Баталов үздік деп танылған ауылдық мәдениет үйлерін марапаттап, арнайы сыйлықтарды табыс еткен болатын.

Өткен аптада өңір мерейін өсірген өнерпаздардың басын қосқан жиын өтіп, З.Қойшыбаева атындағы мәдениет үйінің директоры О.Смағұлов жүздесудің мақсаты «Ауылым – алтын бесігім» байқауының жүлдегерлеріне марапаттарын тапсыру және өздерінің 9 айлық жұмыстарын қорытындылау екендігін айтып өтті. Сөз алған аудан әкімінің орынбасары А.Абдинов жақында ғана шымылдығын жапқан шараның қатысушыларын құттықтап, артынша үздік деп танылған Жыланды ауылдық мәдениет үйіне дыбыс күшейткіш аспап, Лепсі ауылдық мәдениет үйіне компьютер жиынтығын, ал «Үздік концерттік бағдарлама» номинациясымен марапатталған аудан өнерпаздарына 300 мың теңге көлеміндегі сыйақыны табыс етті.

Ұлт болашағы болар жастарды рухани тәрбиемен сусындатып отырған бірден – бір орын – мәдениет үйі екендігі анық. Ол шағын ауылда немесе алып қалада орналасса да, бәрінің мақсаты бір, бағыты айқын. Мемлекет басшысының сарабдал саясатын жүзеге асыруда өзіндік үлесін қосып, еліміздің жаңаша жаңғыруына, рухани түлеуіне атсалысып жүрген барша өнер ошақтарының алдағы жұмыстарына сәттілік тілеймін.

Г.Асенова.

Мәліметпен бөлісу: