Бүгін «Nur Otan» партиясы аудандық филиалының ХХІІІ есеп беру-саулау конференциясы өтті. З.Қойшыбаева атындағы аудандық мәдениет үйінде түңлігін түрген шараға партияның облыстық филиалы төрағасының бірінші орынбасары Г.Тойлыбаева, аудан әкімі А.Абдинов пен партия белсенділері, аудандық және облыстық мәслихат депутаттары қатысты.

Карантиндік талаптарға байланысты делегаттардың басым бөлігі онлайн форматта көрермен болды.

Күн тәртібінде партияның аудандық филиал төрағасын тағайындау, Саяси кеңес мүшелерін және облыстық партия филиалының ХХVІІІ есеп беру-сайлау конференциясына делегаттарды сайлау мәселелері қаралды.

Жиынды аудандық партия филиалы төрағасының бірінші орынбасары Қ.Көкебаев ашып, жүргізді.

Сөз алған облыстық партия филиалының бірінші орынбасары Г.Тойлыбаева Жетісу өңірінде атқарылып жатқан ауқымды дүниелерге тоқталып, алдағы жоспарлар легімен бөлісті. Әсіресе, айдынды Алакөл ауданының алдағы бес жылдықта даму үрдісі нақтыланған сайлаулды бағдарламадағы бастамалардың халықтың хал-ахуалының көтерілуіне орасан зор әсер ететінін тілге сөз қылды. Сонымен қатар өңір басшысы А.Абдиновты аудандық партия филиалының төрағасы етіп сайлауға ұсыныс жасады. Конференция делегаттары да бұл шешіммен толықтай келісті.

Мінберге көтерілген аудан әкімі А.Абдинов партияның бастамашыл қадамдары мен ілкімді істерінің төңірегінде әңгіме өрбітіп, тұрғындар мен билік ортасындағы алтын көпір болу бас партияның басты міндеті екендігін жеткізді.

Келесі кезекте аудандық партия филиалының бірінші орынбасары Қ.Көкебаев сөз алып, өткен жылы жүзеге асқан жұмыстарды жіпке тізіп шықты.

Жарыс сөзге шыққан облыстық мәслихат депутаты Б.Саятова, Ырғайты БПҰ-ның төрайымы А.Қасымжанова, Екпінді БПҰ-ның төрағасы Ә.Қыстаубаев өз тараптарынан атқарылып жатқан дүниелерге тоқталып, баяндамада айтылған жұмыстарға оң бағаларын берді.

А.ЕСЕНБЕКОВ.