Бүгінгі күні Алматы облысы бойынша оңалту рәсімінде 40,8 млрд.теңгеден астам жалпы берешегі бар 19 кәсіпорын бар, оның ішінде салықтар бойынша берешек 1,5 млрд. теңгені құрайды. Бұл ретте берешекті өтеу 6,3 млрд. теңгені құрады. Бұл туралы Алматы облысы бойынша мемлекеттік кірістер Департаменті басшысының орынбасары Сапар Шайкенов баспасөз мәслихатында мәлімдеді. 

«Оңалту және банкроттық туралы» ҚР Заңында борышкердің төлем қабілеттілігін қалпына келтіруге және мүлкін сақтауға бағытталған рәсімдер жеткілікті түрде егжей-тегжейлі жазылған. Оның бірі — оңалту рәсімі.

Заңға сәйкес оңалту рәсімі – сот тәртібімен қолданылатын рәсім, оның шеңберінде борышкерге төлем қабілеттілігін қалпына келтіруге бағытталған қайта ұйымдастыру, ұйымдастыру-шаруашылық, басқару, инвестициялық, техникалық, құқықтық және Қазақстан Республикасының заңнамасына қайшы келмейтін өзге де шаралар қолданылады.

«Шағын қарыздар болған жағдайда, қаржылық дәрменсіздік әлі қайтымсыз бола қоймаған бастапқы кезеңдерде оңалту рәсімі жеткілікті түрде тиімді болғанын атап өткім келеді. Бұл кәсіпорынға бизнесті жандандыруға, оны реформалауға және өндірісті қайта құруға қосымша мүмкіндіктер береді»,-дейді Алматы облысы бойынша мемлекеттік кірістер Департаменті басшысының орынбасары Сапар Шайкенов.

Айта кетейік, заңға енгізілген өзгерістерге сәйкес борышкер мен кредитор, салықтар мен кедендік төлемдер бойынша кредиторды қоспағанда уақытша төлем қабілетсіздігі кезінде және берешегі болған жағдайда оңалту рәсімін қолдану туралы өтінішпен сотқа жүгінуге құқылы.

Оңалту рәсімін қолданудың ерекшелігіне келер болсақ, оны енгізген сәттен бастап берешектің барлық түрлері бойынша, оның ішінде банктік қарыздар мен салықтар бойынша тұрақсыздық айыбын (өсімпұлдарды, айыппұлдарды) есептеу тоқтатылады. Яғни, кәсіпорынның барлық қолда бар берешегі бекітілген жоспарға сәйкес кәсіпорын үшін де, кредиторлардың өздері үшін де ыңғайлы кесте бойынша оңалту рәсімінің шеңберінде және мерзімдерінде өтелетін болады.