Мәдениет — ұлттың болмысы, оның өткені мен бүгінін, болашағын жалғастыратын алтын көпірі. Ал өнер — адам жанын емдейтін, қоғамды ізгілікке, сұлулыққа жетелейтін құдіретті күш. Халқымыз әрдайым өнерді төрге шығарып, мәдениетті елдіктің белгісі деп білген. Ата-бабамыздан қалған осы ұлы мұраны көздің қарашығындай сақтап, оны заман талабына сай жаңғыртып жүрген сіздердің еңбектеріңіз өлшеусіз.

Киелі Алакөл өңірі — өнердің қара шаңырағы, талай дарынды тұлғалар мен мәдениет майталмандары түлеп ұшқан қасиетті мекен. Бүгінде ауданымыздың әрбір ауылында, әрбір мәдениет үйі мен кітапханасында тер төгіп жүрген қызметкерлердің арқасында рухани өміріміз жанданып келеді. Ауылдың тынысын ашып, әрбір қарапайым күнді үлкен мерекеге, ұлттық тәрбие мектебіне айналдырып жүрген еңбектеріңізге бас иеміз.

«AMANAT» партиясы әрқашан ұлттық құндылықтарды сақтауды, мәдениет ошақтарын қолдауды және өнер адамдарына жағдай жасауды өзінің басты бағыттарының бірі деп санайды. Сіздердің халыққа рухани азық сыйлап, жас ұрпақтың бойына патриоттық сезімді ұялату жолындағы аянбай атқарған қызметтеріңіз — мемлекетіміздің берік тірегі.

✨ Осынау айтулы мерекеде баршаңызға:
Сананы серпілтер сарқылмас шабыт, жаңа шығармашылық биіктер;

Еңбектеріңіздің жана беруін, көрерменнің ыстық ықыласы мен толастамас шапалағын;

Әрбір шаңыраққа құт-береке, мықты денсаулық және шынайы бақыт тілеймін!

Өнерлеріңіз үстем, мәдениетіміз асқақ болсын! Мерекелеріңіз құтты болсын, құрметті өнер иелері!