Қазақстан Республикасының Президенті Н.Назарбаев жақында «Төртінші өнеркәсіптік революция жағдайындағы дамудың жаңа мүмкіндіктері» атты Жолдауын жариялап, жаңа міндеттер жүктеген болатын. Солардың қатарында егемендігіміздің айшықты символына айналған Астананың жиырма жылдығына ерекше көңіл бөлу мәселесі де көтерілді.

Тәуелсіздігін тақымға басып, өз алдына жеке мемлекет болып қалыптасқан Қазақстанды әлемге жаңаша қырынан танытқан елордамыз міне осымен жиырма жыл бойы дамуын доғарған емес. Күн санап күмбезі күнмен таласқан алып ғимараттар бой көтеріп, жүздеген, мыңдаған жаңа тұрғындар қоныстануда. Мемлекет басшысы бір сөзінде «Бас қаламыздың қалыптасуы және Еуразияның маңызды даму орталықтарының қатарына қосылу – баршамыздың ортақ мақтанашымыз»,- деп айтқан болатын. Демек, заманауи технологиялар мен жаңашыл прогрестерді күнделікті тірлігінде ұтымды әрі тиімді пайдалып жүрген мегаполистің даму сатысына қарқынды көтерілуі күллі қазақстандықтардың кеуде тұсын шымырлата түсетіні сөзсіз. Осы ретте Ұлт көшбасшысы биылғы Жолдауында Астананың аты мен атағына сызат түсіретін проблемаларды өз уақытында шешуге жол ашатындығына ерекше тоқталып, азаматтардың өмір сүруі мен еңбек етуіне қолайлы ортаны қалыптастыруға барын салатынын жеткізді. Бір қуантарлығы «Смарт Сити» «эталонды» стандарттарының енгізілуі Қазақстанның басқа да қалалары арасында озық практика мен тәжірибе алмасу ісін бір жүйеге келтірмек. Бұның өзі біршама қадам алдыға жылжытып қана қоймай, жаһандық бәсекелестікке бейімділігімізді арттырары сөзсіз.

Жолдаудағы «Ақылды қалалар», «ақылды ұлт» үшін атты бөлімде әр адамның діттеген мақсатына жету жолында өмірін жақсы жаққа өзгертуге арналған міндеттер аясы көрсетілген. Әсіресе «Ақылды қалалар» ұғымы өңірлерді дамыту үшін инвестиция тартып, еліміздің барлық аймағындағы тұрғындардың тұрмыс сапасының еселенуіне септігін тигізбек.

Өткен жылда жеткен жетістіктеріміз бен алған асуларымыз біздің бәсекелестіктегі бәсіміздің жоғары екендігін аңғартқандай. Биылғы Жолдауда көрсетілген мақсат-міндеттердің межесін жоспарлағанай бағындыра білсек нұр үстіне нұр болар еді.

Д.ТҰРДАҚЫНОВА,

аудандық кітапхананың қызметкері.