Жаңа жыл мерекелері кезінде Жетісу облысы аумағында 6 өрт оқиғасы, 1 улы газбен улану жағдайы және 1 авариялық-құтқару операциясы тіркелді. Құтқару операциясы барысында 11 адам, оның ішінде 3 бала құтқарылды. Бұл туралы Жетісу облысының Полиция департаменті Жергілікті полиция қызметі басқармасының бастығы Қайсар Мухметов пен Жетісу облысы ТЖД Жоспарлау және жедел басқару орталығының бастығы Қалдыбек Төлеұлы Жетісу облысының Өңірлік коммуникациялар қызметінің ақпараттық алаңында хабарлады.
ТЖД-нің азаматтық қорғау майорының айтуынша, Талдықорған қаласында газ-ауа қоспасының жарылуы салдарынан жеке тұрғын үйде өрт шығып, үйдің құрылымы құлап түскен. Оқиға нәтижесінде 7 адам, оның ішінде 3 бала зардап шеккен. Өкінішке қарай, екі адам ауруханада көз жұмды.
Ескелді ауданында улы газбен улану оқиғасы тіркелді. Жеке тұрғын үйде ақаулы пештің салдарынан әйел адам ауыр улану алып, қазіргі уақытта жансақтау бөлімінде жатыр.
Сондай-ақ, қар құрсауында қалған кезде құтқарушылар 11 адамды, оның ішінде 3 баланы эвакуациялады. Құтқарылғандарға медициналық көмек қажет болмады.
Мереке күндері қоғамдық тәртіп пен қауіпсіздікті қамтамасыз ету үшін 2 мыңнан астам полиция қызметкері мен шамамен 200 техника жұмылдырылды. Қоғамдық тәртіпті сақтау, құқық бұзушылықтардың алдын алу және пиротехникалық заттарды қауіпсіз пайдалану бойынша бақылау күшейтілді. Рейдтер барысында 2 682 әкімшілік құқық бұзушылық анықталды, оның ішінде 1 898-і жол қозғалысы ережелерін бұзу жағдайлары.