Жаңа жыл мерекесі қарсаңында азаматтардың қауіпсіздігін қамтамасыз ету мақсатында Жетісу облысының аумағында «Пиротехника» жедел-профилактикалық іс-шарасы ұйымдастырылды. Аталған іс-шара 5 желтоқсан мен 3 қаңтар аралығында өткізіледі.
Полиция қызметкерлері сертификатталмаған пиротехникалық бұйымдардың заңсыз сатылуының және оларды тиісті лицензиясы жоқ тұлғалардың өткізуінің алдын алуға ерекше назар аударуда. Сонымен қатар тұрғындарға пиротехникалық бұйымдарды тұрғын үйлердің, автокөліктердің және басқа да тез тұтанатын нысандардың маңында қолданудың қауіпті екені ескертіледі. Атап өтейік, Жетісу облысында 18 азамат пиротехникалық бұйымдарды сатқаны үшін жауапқа тартылды.
Қазақстан Республикасының Әкімшілік құқық бұзушылық туралы кодексінің 483-бабына сәйкес, елді мекендерде пиротехникалық бұйымдарды қолданғаны үшін 25 айлық есептік көрсеткіш (АЕК) мөлшерінде, ал екінші рет қайталанған жағдайда 50 айлық есептік көрсеткіш мөлшерінде айыппұл салынады. Егер бұл құқық бұзушылықты кәмелетке толмағандар жасаса, жауапкершілік олардың ата-аналарына немесе заңды өкілдеріне жүктеледі.
Аталған қызмет түрімен тек ішкі істер органдары берген лицензиясы бар заңды тұлғалар ғана айналыса алады. Пиротехникалық бұйымдар тек қауіпсіздік талаптарына сай жабдықталған сауда орындарында сатылуы тиіс.
Жаңа жыл мерекелері қарсаңында Жетісу облысында өрт қауіпсіздігін күшейту және пиротехниканы заңсыз пайдаланудың алдын алу шаралары қолға алынды.
Төтенше жағдайлар департаменті маманының айтуынша, облыс көлемінде тек бір жерде ғана сертификатталған заңды пиротехникалық бұйымдарды сатуға рұқсат берілген.
Облыс аумағында жаңа жылдық іс-шаралар өтетін 487 нысан толық тексеруден өтті. Тексеру барысында өрт қауіпсіздігі талаптары түсіндіріліп, нысан басшылары мен қызметкерлеріне нұсқамалар берілді, ақпараттық хаттар таратылды. Аталған нысандарға білім беру, денсаулық сақтау, мәдениет, спорт және ойын-сауық мекемелері, сондай-ақ қарттар мен балалар үйлері мен шырша алаңдары кіреді.
Жаңа жыл түні қала және аудан алаңдарында барлығы 13 шырша іске қосылып, қоғамдық қауіпсіздікті қамтамасыз ету мақсатында 64 жеке құрам қызметкері мен 42 бірлік техника жұмылдырылады. Профилактикалық жұмыстар барлық жаңа жылдық мерекелер аяқталғанға дейін жалғасатын болады.