Екі шектің бірін қатты, бірін сәл-пәл кем бұра,

Нағыз қазақ – қазақ емес, нағыз қазақ – домбыра.

Білгің келсе біздің жайды, содан сұра тек қана,

Одан асқан жоқ шежіре, одан асқан жоқ дана.

(Қадыр Мырза Әлі)

Ұлт биігін ұлықтаған Елбасы Н.Назарбаев соңғы екі жылдың басты резонансына айналған «Болашаққа бағдар: рухани жаңғыру» тақырыбындағы тағылымды туындысында тарихы тереңнен өрбіген төл мәдениетімізді сақтау, сол арқылы өзімізге ғана тән ділімізді дәріптеп, болмыс-бітіміміздің биігін насихаттау басты міндеттердің санатында екендігін жеткізген болатын. Осы орайда ықылым заманнан бері қазақ халқының қайғысы мен қуанышын, зары мен запыранан қоңыр үнінің құдыретімен әуелеткен қасиетті домбыраның қадір-қасиетін арттыру көзделген болатын. Сөйтіп Елбасының Жарлығымен шілденің алғашқы жексенбісі «Ұлттық домбыра күні» ретінде бекітіліп, төл аспабымызға деген көзқарас өзгерді.

 

Жаңа мерекенің құрметіне орай «Жастар» аллеясында «Домбыра – асыл мұра» атты шара ұйымдастырылып, сол күнгі ауарайының қолайсыздығына қарамастан жүректерінде ұлттық аспабымызға деген құрметтері бар тұрғындар көптеп жиналды.

Сөз алған аудан әкімінің орынбасары А.Чалкенов көмейінен күмбірлі күй төгелген төл аспабымыз біздің қазақтығымыздың бейнесі, жеке-дара ұлт екендігіміздің айғағы екендігіне тоқталып, сыңғырлаған домбыраның сазды үні әр алаш баласының құлақ құрышын қандырып, жүрек қылын шертетінін баса айтты. Сонымен қатар алғашқы рет аталып отырған мерекемен өнер сүйер қауымды құттықтап, ақжарма тілегін ақтарды.

Артынша ауданымыздың бетке ұстар домбырашылары мен балалар шығармашылығы орталығынының тәрбиеленушілері «Тепеңкөк», «Келіншек», «Ыңғай төк» сынды халық күйлерін орындап, қоңыр үнді сағынған тұрғындарды бір серпілтіп тастады.

Сонымен қатар сирек кездесетін «Ортеке» өнерін меңгерген Нұрсан ақсақал өз қолымен ойылып жасалған ағаш мүсінін домбыра қылына жалғап, күй тарту арқылы ортекені билетіп, жиналғандарды тәнті етті.

АЛМАТ ЕСЕНБЕКОВ.