Табиғат атаулының тамыршысы болған, тұнбалы әсемсалдықты әспеттеген айдынды Алакөлдің 90 жылдығы күні бүгін барша қазағымен бірге жасасып, бірге түлеуде, біте қайнасуда. Осындай ордалы өлкенің өткені мен бүгінінен үзік сыр шертіп, келешегіне қадам бастырар асыл қазыналы «Алты Алаштың Алакөл» атты кітаптың тұсаукесер рәсімі аудан әкімдігінің кіші мәжіліс залында өтті.

Сан тарамы тарихтың парақтарын ақтарып, ауданның ескісін түгендеп, жаңасын әйгілеген кітаптың шығуына аудан әкімдігі мұрындық болып, ақын А.Кендірбековтың идеясы бойынша бастырылып шығарылды. Оның ауанына үңілер болсаңыз: жергілікті жерлердің, елді-мекендердің, ауылдық-округтердің шығу тарихы, қатпарлы қарт таулардың, салалап аққан өзендер мен майда толқынымен қызықтырар көлдердің, жортқан аң мен ұшқан құстың, қысқасы Алакөл аймағы дегенде көзге ұратын тіршілік атаулының барлығы баяндалады. Одан бөлек, ел басқарған әкімдердің, халық қалаулыларының, одан қала берді, мекеме басшылары, ауданға еңбегі сіңген ғалымдар, академиктер, ақын-жазушылар болсын, барлығы дерлік осы кітапқа тоғыстырылып, топтастырылған. Көрікті жерлердің кербез суреттерін де осыннан кездестіресіз. Ұңғылына шежіре толған бұл кітаптаАлакөл жайлы аңыздар мен ауданға арналған ән-жырлар да жеке-жеке бөлімдермен салаласып жатады.

Кітапты құрастырып, пошымын келістірген А.Кендірбековтың ерен еңбегін өңір басшысы Ә.Жақанбаев ерекше атап өтіп, ауыл ақсақалдарымен аудан жұртшылғының атынан алғыс жаудырды. Ендігі осы құнды кітап – әрбіріміздің үйімізде болуы тиіс екенін жеткізді. Шара соңында жиналғандар қауымына күні бүгін тұсауы кесілген  «Алты Алаштың Алакөлі» атты кітабы табысталды.

Т.АЙТБАЕВ.