Әр дәуірдің өз ұраны болады. Бір кезеңде халыққа еркіндік қажет болды, бір кезеңде тәуелсіздік үшін күрестік. Бүгінгі Қазақстан үшін ең маңызды құндылықтың бірі – заң үстемдігі. Себебі заң жоқ жерде еркіндік те, даму да, әділет те ұзақ өмір сүрмейді.

Біз кейде мемлекетті өзгертуді биліктен бастау керек деп ойлаймыз. Шын мәнінде кез келген өзгеріс адамның өзінен басталады. Бағдаршамның қызыл түсіне тоқтау – бұл жай ғана жол ережесін орындау емес. Бұл – өзгенің өміріне деген құрмет. Салық төлеу – мемлекетке ақша беру емес, ортақ жауапкершілікті мойындау. Қоқысты арнайы орынға тастау – тазалық емес, мәдениет. Осындай қарапайым әрекеттердің жиынтығы құқықтық қоғамды қалыптастырады.

Өкінішке қарай, біз әлі де болса заңды міндет емес, кедергі ретінде қабылдайтын кездер кездеседі. «Танысым бар», «бір рет ештеңе болмайды», «бәрі солай істейді» деген түсінік қоғамның дамуын тежейтін ең қауіпті дерт. Бұл сөздер жеке адамның ғана емес, тұтас мемлекеттің мүмкіндігін шектейді.

Президент Қасым-Жомарт Тоқаевтың «Заң және тәртіп» қағидатын мемлекеттік саясаттың негізгі бағыты ретінде белгілеуі – дәл осы ескі көзқарасты өзгертудің бастамасы. Бұл бастама жазалауды көбейту үшін емес, заңды құрметтеуді өмір салтына айналдыру үшін қажет.

Әлемнің дамыған елдеріне қарасақ, олардың жетістігінің негізінде қымбат технология немесе табиғи байлық қана тұрған жоқ. Ең алдымен заңға деген құрмет тұр. Адамдар заңды камерадан немесе айыппұлдан қорыққандықтан емес, оны қоғам алдындағы парызы деп қабылдайды. Нағыз өркениет дәл осы жерден басталады.

Бүгін Қазақстан жаңа кезеңге аяқ басты. Экономика жаңарып жатыр, қалалар өсіп келеді, цифрлық технологиялар дамуда. Бірақ осы өзгерістердің барлығы бір ғана іргетасқа сүйенуі керек. Ол – заң. Егер заң әлсіз болса, ең озық реформаның өзі нәтиже бермейді. Ал заң үстемдік құрса, кез келген қиындықты еңсеруге болады.

Құқықтық мемлекет бір күнде құрылмайды. Ол әр адамның таңдауынан қалыптасады. Біз жолда қандай жүргізушіміз, жұмыста қандай қызметкерміз, қоғамда қандай азаматпыз – мемлекеттің келбетін осы анықтайды.

Сондықтан «Заң және тәртіп» – биліктің талабы ғана емес, уақыттың талабы. Бұл – Қазақстанның бәсекеге қабілетті, қауіпсіз әрі әділетті мемлекет болуына апарар жол. Заңды құрметтеу арқылы ғана біз өзіміз құрметтейтін қоғамды қалыптастыра аламыз.

Өйткені заңға сүйенген халық ешқашан әлсіремейді. Ал заңды айналып өтуді әдетке айналдырған қоғам өзінің болашағын да айналып өтеді