Кейде елдегі үлкен өзгерістер қарапайым нәрседен басталады. Бір тал көшет отырғызу, бір ауланы тазалау, бір көшеге ұқыпты қарау – сырт көзге шағын әрекет. Бірақ осындай қадамдар көпшілікке ортақ әдетке айналғанда, қоғамның мәдениеті де өзгереді.

Президент Қасым-Жомарт Тоқаевтың бастамасымен қолға алынған «Таза Қазақстан» акциясының мәні де осында деп ойлаймын. Бұл – жай ғана сенбілік өткізіп, қоқыс жинау емес. Ең бастысы – адамдардың туған жеріне деген көзқарасын өзгерту.

Бастаманың қысқа уақыт ішінде бүкіл елге кең таралуы оның қоғам үшін маңызды мәселені дөп басқанын көрсетеді. Әр өңірде тұрғындар, жастар, еріктілер, еңбек ұжымдары тазалық пен абаттандыру жұмыстарына атсалысып келеді.

Маған бұл бастаманың бір ерекшелігі ұнайды: ол жауапкершілікті тек мемлекеттен күтпей, әр азаматты ортақ іске шақырады. Себебі таза көшені мемлекет жасап бере алады, бірақ оны таза ұстайтын – адамның өзі.

Тазалықтың артында тәртіп тұр. Тәртіптің артында жауапкершілік бар. Ал жауапкершілігі қалыптасқан қоғам ғана алға жылжиды.

Сондықтан «Таза Қазақстан» – атауы қарапайым болғанымен, мағынасы ауқымды бастама. Ол бізге бір қарапайым нәрсені еске салады: елді өзгерту алыстан басталмайды. Өз аулаңнан, өз көшеңнен, өзіңнен басталады.

Таза Қазақстан – ең алдымен таза көзқарас пен жауапты азаматтан құралады.