Есімі егемен Қазақстанмен тел аталатын Елбасы күніне орай аудандық мәдениет және тілдерді дамыту бөлімінің мұрындық болуымен «Елім менің» тақырыбында патриоттық ән байқауы жалауын желбіретті.

Оған ауданның түкпір-түкпірінен барлығы жиырмаға жуық үміткер қатысып, төрт сағатқа созылған өнер додасында таланттарын таразылады.

Шарының шымылдығын ашқан аудандық мәдениет және тілдерді дамыту бөлімінің басшысы Г.Жексембаева тәуелсіз мемлекетіміздің бүгінде алты құрлықта аспандап тұрған атақ-абыройын қалыптастырған Тұңғыш Президентіміз Н.Назарбаевтың ерен еңбегін сөз етіп, әнімен Алакөлді тербеткелі келгендерге сәттілік тіледі.

Отан, туған жер, туған ел тақырыптарында шырқалған әндерді көрермендер де, әділқазы алқалары да тамсана тыңдады. Елім дегенде тынысы жиілеп, тұлпар мініп, найза көтерген текті халықтың ұрпағна бұл үйреншікті қасиет.

Кезек-кезегімен сахнаға шыққан үміткерлердің патриоттық әндерге жаңаша реңк беріп, өзгеше стильде орындаулары, өнер әлеміне де берекшектері бар екендіктерін танытулары қуанарлық жайт болды.

Туа бітті талант пен Тәңірден бұйырған өнер сарапқа түскен сайыста үшінші орын үшаралдық А.Несіпбектің тақымыда кетсе, екінші орынды аудандық «Алакөл» газетінің жас тілшісі Н.Мақсатұлы қанжығалады. Ал бірінші орынды үшаралдық А.Мұхамбетова иемденсе, бас жүлде көлбайлық Н.Қартабаевқа бұйырды.

Жүлдегерлерге арнайы дипломдар мен бағалы сыйлықтар табысталды.

А.АЗИМХАНОВА,

Бұлақты ауылдық мәдениет үйінің әдіскері.