Қыз – ар-ұят. Қыз – ұлттың қызғалдағы. Жүректің қылын шертіп, қан ойнатып құлпырған, тірсегіне түскен бұрымын текті ұлдар тағдырына балап, жастық отын жандырып, сұлулық пен даналықты, өжеттілік пен қайсарлықты бір бойына ұштастыра білген, өмірдің сәні мен мәніне айналған қазақ қыздары халықтың асыл қазынасы.

Қазақтың арулары – тұнып тұрған ұлттық тәрбиенің, салт-сананың, дәстүр мен ғұрыптың, күрескерліктің тумасы. Осының дәлелі З.Қойшыбаева атындағы мәдениет ошағында аудандық мәдениет және тілдерді дамыту бөлімінің ұйымдастыруымен өткізілген «Ана тілі аруы» байқауы болды. Сайыстың басты мақсаты «Тілдерді дамыту мен қолданудың  2011-2020 жылдарға арналған мемлекеттік бағдарламасын»  жүзеге  асыру, тіл мәдениетін көтеретін, көркем әдебиетті насихаттауды  жандандыратын, ұлттық  құндылықты,  дәстүрлі мәдениетімізді айшықтайтын, талантты аруларды анықтау.

Байқауға ауданымыздың әр өңірінен 16-22 жас аралығындағы 14 бойжеткен бақ сынасты.

Сайыс барлығы 5 кезеңнен тұрды. Олар: «Мен қазақтың қызымын» таныстыру кезеңі,  аруларымыз жан, тән сұлулығын ұштастыра, сахна  мәдениетін сақтай отырып өздерін таныстырды.ІІ кезең Невада-Семей  антиядролық қозғалысына 30 жыл толуына орай, «Қазақстан – ядролық қарусыз әлем» тақырыбында латын қарпінде эссе жазу. ІІІ кезең «Ұлылар әлеміне саяхат» Абай, Шәкәрім поэзиялық шығармаларынан 1 өлең жатқа мәнерлеп оқу. ІV кезең  он саусағынан өнер тамған, яғни матадан ою-өрнек қию, ұршық иіру, құрақ құрау. Және соңғысы  «Өнерім-өрісім» кезеңі (ән мен би сахналық қойылым т.б) болды.

Сайыс барлығы 3 сағатқа созылып, аталған сындардан сүрінбей өтіп, төрешілердің шешімімен «Ана тілі аруы» атағына Ырғайты ауылдық округінен келген Айман Тасқын ие болды.

М.МАУЛЕНОВА

Абылай хан атындағы Қазақ Халықаралық Қатынастар және Әлем тілдері университеті журналистика мамандығының 4 курс студенті.