Жуырда облыстық білім және ғылым қызметкерлері кәсіподақ ұйымы алғаш рет жоғары сынып оқушылары арасында «Ұстаз болғым келеді…» шығармалар байқауын ұйымдастырды. 

Шараның іріктеу кезеңі мектепшілік, аудандық және қалалық деңгейде өтіп, 89 үміткердің 21-і облыстық кезеңге жолдама алды. Екі айға созылған байқаудың қорытынды кезеңінде «Білімді ел» республикалық газетінің бас редакторы Л.Түркістанова, облыстық тілдерді дамыту басқармасының басшысы А.Башбаев, облыстық білім беруді дамыту оқу-әдістемелік басқармасының басшысы А.Қабдұлова, І.Жансүгіров атындағы Жетісу мемлекеттік университеті гуманитарлық факультетінің деканы А.Рахимова, «Өлке тынысы» ЖШС-нің басшысы М.Жанәділов, №20 мектеп-лицейінің мұғалімі Ә.Әмірова және облыстық ұйымның төрағасы С.Әбдіқадыров төрағалық жасап, жүзден жүйрікті анықтады. 

Қорытынды кеште кәсіподақ өкілдері мен сала ардагерлері оқушыларға жылы лебіздерін білдіріп, ақ тілектерін арнады.  І.Жансүгіров атындағы Жетісу мемлекеттік университеті гуманитарлық факультетінің деканы А.Маратқызы байқау шартына сай жазылған шығармалардың мазмұнына, оқушының сауаттылығына, ойының ұшқырлығына қарай баға беріп, шын жүйрікті анықтауға атсалысқандарын айтып өтті. 

Байқауға Алакөл ауданы атынан үш оқушы қатысып, бас жүлдені Жыланды орта мектеп лицейінің 11-сынып оқушысы Ұ.Базарбаев (мұғалімі Ғ.Жанахметова) жеңіп алды.

Алматы облыстық білім және ғылым қызметкерлері кәсіподақ ұйымы  І.Жансүгіров атындағы Жетісу мемлекеттік университетіне ұстаз мамандығы бойынша оқуға түскен жағдайда шәкіртақы тағайындау туралы сертификатымен марапаттап,  ақшалай сыйлық табыстады.

Жүлдегерлерге алғыс хаттар мен бағалы сыйлықтар табысталып, байқау шағын концертпен жалғасын тапты.

К.АЛПЫСБАЕВ,

«Алматы облыстық білім және ғылым қызметкерлері кәсіподақ ұйымы» қоғамдық бірлестігі аудандық филиалының төрағасы.