Тәуелсіздік алған жылдары, қиын қыстау кезеңде саяси және экономикалық қиындықтармен күресуде, мемлекет үшін маңызды шешімдерді қабылдауда Қасым-Жомарт Тоқаевтың  рөлі айқын болды. Ол тек Қазақстан аумағында емес, БҰҰ төңірегінде саяси дипломат атана алды. Ел бірлігін мығым ұстап, татулықты ту ететін турашыл басшыны таңдауға халық ат салысты. 9 маусымда өткізілген сайлау қорытындысы бойынша Қасым-Жомарт Кемелұлы Тоқаев 70,96 % басымдылықпен дауыс жинап, ел Президенті атанды.

Парламент депутаттары, Конститутциялық кеңес өкілдері, жоғарғы сот төрағаларының алдында, барша халық тамашалаған саяси жиында Қазақстан жұртшылығына ант беріп, әр азаматтың құқықтары мен мүдделерін қорғауды басты міндеті санайтынын атап өтті. Мемлекеттің кемелденуі мен ел еңсесінің биік болуы жолында атқарылатын істерді тізбектеп, негізгі бағыт жастармен жасалатын жұмысқа бағытталатынын қадап айтты. Елбасының бастамасымен тағайындалған «Жастар жылы» да әрі қарай өз жалғасын табатынын, ол үшін түрлі жоспар құрылып, ауқымды жобалар жүзеге асатынын тілге тиек етті. Жаңа Президент өз сөзінде ел тізгінін ұстар болашақ  жастардың саналы, білімді, ғылым мен техниканы игеруге қабілетті екендігін көрсетіп, ертеңгі күнімізге алаңдайтын еш негіз жоқтығына зор сенім білдірді. Біз, жастар, көшбасшымыздың барлық бастамасын қолдай отырып, артылған үмітті ақтауға өз тарапымыздан ат салысамыз.

А.ЕСЕНБЕКОВА,

Үшарал №1 орта мектебінің ағылшын тілі пәнінің мұғалімі.