Ел Президенті Қ.Тоқаев Қазақстан халқына алғашқы Жолдауын жариялады. Мемлекетіміздің алдағы уақыттағы даму жоспары мен әр саладағы ревормалар көрініс тапқан бұл Жолдау еліміздің жаһандық бәсекелестіктегі бәсінің жоғары түсуіне түрткі болмақ.

Олай дейтініміздің бір себебі шағын, әсіресе микробизнес өкілдеріне салынар салықты алып тастау мәселесі. Қазақстанның қуатты елге айналуы ең алдымен мұндағы тұрғындардың  әлеуметтік жағдайына байланысты. Ал кәсіп ашып, өз нәсібін тапқысы келгендерге салықтық үстемені салмай, артық шығыннан арылту бұл олар үшін өте қолайлы болмақ.

Енді 2020 жылдан бастап шағын және микробизнес өкілдері салықтан босап, олардың үстінен тексеріс жұмыстарына да тыйым салынбақ. Соның арқасында жеке кәсіпке бет бұрар азаматтардың қарасы артып, экономикалық өсім аңғарылмақ. Президент Қ.Тоқаев өз сөзінде бұған дейін де бюджеттен 100 млрд. теңге бөлініп, жергілікті әкімдіктердің дұрыс жұмыс атқармауынан жоспар ойдағыдай орындалмағанын жеткізді. Сондықтан да 2020 жылдан бастап бұл іске қатаң бақылау орнатылып, жаңа кәсіп көздерінің ашылуы мен дамуына көп назар салынбақ.

Сонымен қатар Президент шағын, орта бизнестің дамуына кедергі келтіру мемлекетке қарсы істелген қастандықпен тең екендігін жеткізді. Себебі түрлі тексерістердің салдарынан өз қызметін тоқтатып, дағдарысқа да ұшырап жатқан кәсіпкерлер жетерлік. Алдағы уақытта осы келеңсіздіктің жолы кесілмек.

Н.ХУСИНОВ,

Жас кәсіпкер.