Елбасымыз Н.Назарбаевтың болашағымыздың бағытын айқындап, ұлт тірлігіне тарихи төңкеріс әкелген бағдарламалық мақаласының аясында облыстық дін істері басқармасының ұйытқы болуымен Тәңірдің рақымы жауған жер жәннаты Жетісу өлкесін аралау мақсатында «Рухани керуен» жолға шыққан болатын. Әр саланың жілігін шағып, майын ішкен майталман мамандардан құралған топ жерұйық атанған жомарт даласы бар айдынды Алакөлге де ат басын тіреді.

Керуен көші бұл жолы шекара шебінде орналасқан Достық ауылдық округіне арайы барып, шеткері жатқан елді мекеннің жұртымен жолығып қайтты.

Қазақстан халқының дәстүрлі рухани мәдениетін ілгерілету, мемлекетіміздің рухани тірегі – діннің жалпыға ортақ адамгершілік қағидаларын дәріптеу баршамыздың азаматтық борышымыз саналады.

Осы ретте рухани құндылықтарды дәріптей отырып, әрбір қазақстандықтың рухани санасын жаңғырту, туған жерге деген сүйіспеншілігімен патриоттық сезімін арттыру мақсатында болуымен ұйымдастырылып отырған «Рухани керуен» жобасының үшінші кезеңі өз жалғасын табуда.

Қазақстан  халқының дәстүрлі рухани мәдениетін ілгерілету, мемлекетіміздің рухани тірегі, дініміздің жалпыға ортақ адамгершілік қағидасын насихаттау, ұлттық құндылықтарды жаңғырту және деструктивті діни ағымдарға қарсы имммунитет қалыптастыруды көздеген игі жобаның шымылдығы өткен екі кезеңде атқарылған істер пысықталған бейнероликпен ашылды.

Сөз алған Дін саласындағы мәселелерді зерттеу орталығы директорының орынбасары А.Әлі «Рухани керуен» сапары қалай және қандай бағытта өтетінін баяндады.

Имамдардың білімін жетілдіру институтының оқытушысы, философия ғылымдарының докторы Б.Бейсенов және облыстық «Жетісу» телеарнасының бас продюсері, ҚР Мәдениет қайраткері, Қазақстанның Құрметті журналисі Ж.Жайлаубаев рухани құндылық, діни сауаттылық және ұлттық болмыс хақында сөз қозғады.

Шет тілдер және іскерлік карьера университеті дінтану мамандығы бойынша гуманитарлы ғылымдарының магистрі С.Сапарғали адам ойындағы ең қуатты сезім «Сенім мен иман» жайында ой толғады.

Артынша әуезді әндер айтылып, күмбірлі күйлер тартылып, «Рухани керуеннің» сапарына сәттілік тіленді.

Н.МАҚСАТҰЛЫ.