Мемлекет басшысы Қ.Тоқаев Абай Құнанбайұлының 175 жылдығына арналған «Абай және ХХІ ғасырдағы Қазақстан» атты көлемді мақаласын жариялады.  Аталмыш  мақала ұлы ақынның тұлғасын тек республикалық қана емес, әлемдік деңгейде ұлықтауға және бүкіл Қазақстан халқын ұлы Абайдың 175 жылдығы құрметіне қолға алынған игі бастамаларға белсене атсалысуға шақырды.

«Бұл тойдың тұсындағы басты мақсатымыз – бүкіл халықтың ұлт ұстазы алдындағы өзіндік бір есеп беруі іспеттес болуға тиіс деп білемін. Абай сыны – ауыр сын, сындарлы сын. Елбасы бастап, ел қостап, биік белестерді бағындырдық. Озық елулікке кіреміз деп мақсат қойдық, ол мақсатқа мерзімінен бұрын жеттік.Озық отыздыққа қосылуды межеледік. Ол межеге де жетеміз. Сол межеге жетуге де бізге Абай мұрасы көмек бере алады. Ендігі мәселе – біз сол Абайдың көмегін түсіне алдық па, зерделей аламыз ба?», – дейді Президент.

Сонымен қатар Жидебайда музейге арнайы лайықталған “Абай мұрасы” атты жаңа ғимарат салу қажеттігін атап, 1918 жылы Семей қаласында Мұхтар Әуезов пен Жүсіпбек Аймауытов негізін қалаған, 1992 жылдан бері қайта шыға бастаған “Абай” журналына мемлекет тарапынан қолдау көрсетілетінін ескертті. Және “Жидебай-Бөрілі” мемлекеттік тарихи-мәдени және әдеби-мемориалдық қорық-музейіне ерекше көңіл бөліп, ғылыми-танымдық жұмыстармен айналысатын орталыққа айналдыруды тапсырды.

Бүгінде Елбасы Н.Назарбаев пен Президент Қ.Тоқаевтың бастамасымен еліміздің әр аймағында Абай арқылы ұлттық болмасымызды насихаттау, өскелең ұрпақтың санасына сіңіру мақсатында көптеген тиімді іс-шаралар атқарылып жатқандығы жасырын емес. Сондай-ақ, ұлттық болмысымызды Абай тұлғасы арқылы әлемге паш ету жұмыстары мен мектептерде Абайтану орталықтарын ашу қарқынды жүргізілуде.

Абай сөзі дәл бүгінгі заманымыз үшін көкейкесті.  Ақын шығармаларынан халқымыз тағылым алуға тиісті. Қазақ халқы болып бастау алған игі іске  жұмыла кірісу ұлы ақынға деген құрметтің белгісі деп білемін.

М.ҚУАТҚЫЗЫ.