Соңғы ылдары өте жылдам дамып келе жатқан джуи-джитсу спортында Алакөлдің де өзіндік салмағы бар. Себебі А.Нұрланұлынң тәрбиесіндегі шәкірттері қай додаға аттанса да міндетті түрде жеңіс  тұғырынан көрінуде.

Оған жуырда Алматы қаласында өткен халықаралық тунирдегі жеңісті сәттер дәлел бола алады. Бұл додаға Әзірбайжан, Өзбекстан, Қырғыстан, Қазақстан, Ресей, Түркіменстан сынды мемлекеттерден 300-ден астам спортшы қатысты. Өңіріміздің өр намысын қорғап барган жас чемпиондар әр мемлекеттен келген сайыпқырандармен тең дәрежеде таласқа түсіп, өздерінің айқын басымдықтарын көрсете білді.

Сөйтіп алакөлдің өрендері қоржынымызға 4 алтын, 3 күміс, 5 қола медаль салып, атағымызды үстей түсті.

Осы турнирда жерлесіміз Мағжан Жолдасхановтың жекпе-жегі ең үздіктердің қатарында болды. Ақтық сында ол өзбекстандық спортшымен алаңға шығып, өзара тартыста керемет өнер көрсетті. Сөйтіп, доданың алтынын қанжығалаған еді.

Сонымен қатар Жанбол Мұхтаров, Нұрайым Зәуренбек, Ертарғын Айтқазы алтын, Жания Тастаубаева, Абдуннұр Рүстемұлы, Ерік Елдос күміс, Дияна Асқарқызы, Әмірлан Төлеубек, Данияр Маратұлы, Әділет Өмірзақ, Темірлан Сұлтанбеков қола медальді мойнына тақты.

Біз де өз тарапымыздан жүлдегерлерді жеңісімен құттықтап, жаңа жетістіктер мен жеңістер тілейміз.

А.ХАНЗАДА.