Қызына қырық үйден тыйым жасаған текті жұртымыз «Әйелдің азғаны – ұлттың тозғаны» деп бекер айтпаған. Себебі, тұтастай бір мемлекеттің болашағын өмірге әкеліп, оларды тал бесіктен талмай бағып, тәлім-тәрбиенің уызына жарытатын да солар. Сондықтан, қырмызы гүлдей құлпырған қыздарымыздың қылықты, ұқыпты, ұлағатты болып бойжетулері үшін ата-аналар да, тиісті мекемелер де бар күш-жігерлерін салуда.

Осы ретте аудандық ішкі саясат бөлімінің әлеуметтік-мемлекеттік тапсырысы аясында «Достық қырандары» ЖҚБ-нің ұйымдастыруымен Қабанбай ауылдық округінде «Ерте жүктіліктің ертеңі қандай?» тақырыбында жасөспірім қыздармен кездесу өтті.

Шараның басты мақсаты қазақ менталитіне жат қылық «Ерте жастағы жүктіліктің» алдын алу, бұл тұрпайылықтың зардаптары мен адам денсаулығына тигізер орасан зор қауіпін түсіндіру және қарындастарымызды тиісті тәрбиемен сусындату болды.

Аталмыш жиынға аудандық ішкі саясат бөлімінің басшысы М.Сүлейменов төрағалық етті.
Сөз алған Үшарал қалалық мешітінің бас имамы С.Шәріп «Шариғаттағы зинақорлықтың қатері», аудандық аналар кеңесінің төрайымы Ұ.Дүйсебаева «Ерте жүктілік жат қылық» тақырыбында баяндама оқыса, «Достық қырандары» ЖҚБ-нің жетекшісі Д.Тойбеков осы мәселеге байланысты өңірдегі ахуал жайлы айтып кетті. Сонымен қатар Қабанбай аудандық орталық ауруханасының дәрігері Р.Нұрпейісова, Қабанбай №1 орта мектебінің медбикесі А.Сағидолдаева мен Қабанбай №3 орта мектебінің психолог маманы С.Базарбаева талқыланып жатқан тақырып төңірегінде әңгіме өрбітіп, түсіндіру жұмыстарын жүргізді.

АЛМАТ ЕСЕНБЕКОВ.