Қазақ даласының кеңінен тыныс алуы ең алдымен 1990 жылғы 25 қазанмен сабақтасып жатыр. Себебі, дәл осы күні еліміздің егемендігі жарияланып, саяси-құқықтық тәуелсіздігі жария етілді. Дербестік декларациясы қабылданып, күллі ұлыс бөркін аспанға атқан мерейлі мереке де осы.

Мың жылдықтар төрінен тамыр тартып, «Мәңгілік ел» болу мұратына қарай көш түзеген қазақ елінің өткеніне үңілсек небір зобалаңдарды көреміз. Ұлт ретінде жойылып кетуге шақ қалған тағдыршешті сәттерде аман қалып, ақыры азаттығына қол жеткізген еліміз бүгінде егемендігімен еңселі, тәуелсіздігімен тұғырлы. Бұл жолда бабалар қаны төгілді, жаны сөгілді. Алайда, тарихтың небір солқылдақ өткелінде өжеттік танытып, бүгінгі дәреженің дәрегейіне шығып отырмыз.

Тәуба, осынау егемендік жылдары елдің еңсесі тіктелді, етек-жеңін жинады. Арайлап аьқан ақ таңның азаттықпен ұштасқан тұсы да осы мерекемен тамырлас. «Тәуелсіздік» деп ұран салған ұлтымыз дәл осы мезеттедағдарыс, жұмыссыздық, кедейшілік сынды ауыр мәселелермен жолықты. Талай жылдар орталықтан басқарылған мемлекеттік саясат пен билік басындағы атқамінерлердің нағыз іске кірісер, білек сыбана, балақ түре ел болашағы үшін еңбек етер мезеті басталды. Мемлекет болып ұйымқалы бергі өнегелі өткеніміздің қай тұсына көз жүгіртсек те ең алдымен елдің береке-бірлігінің арқасында шаңырағымыз шайқалмай, замана сынағынан сүрінбей өткенімізді аңғарамыз. Яғни, осы тұста тастүйін ымырашылдығымыздың арқасында бізге алынбас қамал жоқтығын аңғардық.

Барша Отандастарымды осы мерейлі мерекемен құттықтағым келеді. Егемендік жолында ерлікке де, еңбекке де араласып, ел болашағын баянды етуде жұрт болып жұмыла берейік. Кемел келешекті қалыптастыру әр қазақстандықтың тағдырымен байланысып жатқанын ұмытқпайық.

Тезекбай САДИЕВ,

Алакөл ауданының Құрметті азаматы, еңбек ардагері, ақын.