Жуырда аудандық ардагерлер үйінің мәжіліс залында бос жұмыс орындары жәрмеңкесі өтті. Бұл шараны аудандық мансап орталығы аудандық прокуратура, сот орындаушылары және жұмыс берушілер, оқу орындарымен бірлесіп ұйымдастырған.

Шара басында аудандық мансап орталығының директоры Л.С.Қосантаева сөз сөйлеп, жұмыс барысымен, жұмыс берушілер және оқу орындарымен таныстырды. Содан кейін аудан әкімінің орынбасары М.Т.Төлеужанов сөз алып, жұмыс орнын таңдауда қателеспеуді, мұқият болуды сұрап, оқу орталықтарының жұмысы туралы сөз қозғады.

         Жәрмеңкеге аудан бойынша жұмыс іздеп жүрген және жұмыссыздар қатарынан, оның ішінде 9 пробация қызметінің бақылауында тұрғандар және алимент бойынша борышкерлер бар, барлығы  135 адам қатысты.

Аудандық мансап орталығының мәліметінше, 39 бос жұмыс орындарын ұсынған 13 жұмыс беруші және 3 оқу орындары жұмыссыз жүрген азаматтарға толық мәліметтер берді. Ұсынылған бос жұмыс орындары бойынша 15 адам тұрақты жұмысқа орналасып, 35 адам қысқа мерзімді кәсіптік оқытуға ниет білдірді, 150 адам наурыз айынан бастап қоғамдық жұмысқа жіберіледі.

Сондай-ақ жұмысқа орналасқан азаматтардың ішінде пробация қызметінің бақылауында тұрған 2 азамат тұрақты жұмысқа орналасты, 4 адам қысқа мерзімді кәсіптік оқытуға ниет білдірді, 2 адам қоғамдық жұмысқа жіберіледі.

А.ӘБИТҰЛЫ.