Қазақта «Апат айтып келмейді» дегенмен, қатерлі жерде қаперсіз отыруға болмайтынын да білеміз. Етігімізден асқан су етекке жабысқанда «Не болды, не істейміз?»-дің құрығына іліндік те қалдық.
Еліміздің біраз бөлігінде көктемгі қар еріп, төрт түліктің ауыз енді көкке жеткенінде топан су тұтқиылдан тап берді. Дүние-мүлік, мал мен техника шығынға кетті. Амал қанша, уақытты кері бұрып, алдын ала қамдануға мүмкіндік жоқ. Алайда, осы қиындықтан жұрт болып жұмыла шығуымыз қажет.
«Менің басыма түскен нәубет емес» деп, немқұрайлы қарап отыру адамгершілікке жат. Сондықтан да апатты аймақтарға барынша материалдық көмек көрсетіп, амандықтарын тілеп, дұғада болуымыз шар. Жақсылықта да, жамандықтан да Абайша айтсақ «Біріңді қазақ, бірін дос» көріп, барынша қолдау жасағанымыз абзал.
Бұл апат барлығымыз сабақ болғаны сөзсіз. Күні кеше мемлекет басшысы Қ.Тоқаев та осы мәселеге байланысты шұғыл кеңес өткізіп, су басқан жерлердің азаматтарына толықтай көмек көрсетілетінін жеткізді. Апаттың алдын алмағаны үшін бірнеше лауазымды тұлғаларға, әкімдерге қатаң сөгіс жариялап, ескерту жасады. Кеңес барысында алдағы жұмыс жоспары бекітіліп, республикалық штаб құру жөнінде тапсырма берілді. Бұл жұмыстар өз нәтижесін береді деген үміттеміз.
Апатты аймақтағы ағайынға сабыр берсін. Біз сіздермен біргеміз.

Алмат ЕСЕНБЕКОВ,
«Алакөл» газетінің бас редакторы.