8 наурыз – көктемнің, нәзіктіктің, махаббат пен мейірімнің мерекесі. Бұл күн тек аналар мен аруларға ғана арналған емес, өз еңбегімен адамзатқа қызмет етіп жүрген әйелдердің де мейрамы. Әсіресе, медицина саласында еңбек ететін жандар – нағыз жанқиярлықтың, мейірімділіктің, төзімділіктің символы.

Медбикелер – ауруханадағы ең маңызды тұлғалардың бірі. Олар дәрігерлер мен науқастар арасындағы алтын көпір, емдеу ісіндегі сенімді көмекші ғана емес, ең алдымен, қамқорлық пен жылулық сыйлайтын жандар. Кез келген ауруханада медбикелерсіз жұмыс толыққанды жүрмейді. Науқастың жағдайын бақылау, дәрі-дәрмектерді уақытылы беру, хирургиялық процедураларға қатысу, моральдық қолдау көрсету – осының бәрі олардың күнделікті міндеті.

Амангелдинова Бөпежан Шалқарқызы – өз мамандығын жүрек қалауымен таңдаған абзал жандардың бірі. Ол 2003 жылы Үшарал қаласында дүниеге келді. Балалық шағынан-ақ ата-анасының «Адамдарға көмектес, медицина саласына бар» деген сөздерін жүрегіне түйіп өсті. Анасы үнемі: «Қызым, қартайғанда, ауырғанда бізді емдейтін сен боласың» деп айтып отыратын. Осы сөздер оның болашаққа деген бағдарын айқындап берді.

9-сыныптан кейін Бөпежан Алматы жоғары медициналық колледжіне оқуға түсіп, 4 жыл бойы білім алып, медбике мамандығын игерді. Дипломын алған соң туған жері Үшаралға оралып, Алакөл аудандық орталық ауруханасына жұмысқа орналасты. Алғашқы жылдары жан сақтау бөлімінде қызмет етті, ал бүгінде хирургия және травматология бөлімінің аға медбикесі ретінде науқастардың сауығуына атсалысып жүр.

«Медицина саласына келуім – өмірімдегі ең дұрыс шешім болды. Бұл кәсіп тек табыс табу емес, адамдардың өміріне араша түсіп, олардың денсаулығы үшін күресу. Жан сақтау бөлімінде жұмыс істеген кездерде әрбір секундтың маңызды екенін түсіндім. Мұнда адам өмірі сенің шешіміңе, әрекетіңе байланысты болады. Бұл – үлкен жауапкершілік», – дейді ол.

Медбике болу – тек медициналық процедураларды орындау ғана емес, адам жанына ем болу. Олар әрбір науқасқа аналық мейіріммен қарап, ауруханада жатқан жандардың жақындары секілді болады. Ауруханадағы өмірдің қиын сәттерімен бетпе-бет келетін де – солар. Олар науқастардың ауырсынуын жеңілдетіп, олардың сауығуына бар күшін салады.

Хирургия және травматология бөлімінде жұмыс істеу – үлкен қажырлық пен мықты мінезді талап етеді. Себебі мұнда әрбір пациент ерекше күтімді қажет етеді. Бөпежан Шалқарқызы үшін әрбір сауығып кеткен науқас – ең үлкен марапат. Оның қызметі тек өз міндетін орындау ғана емес, әр пациенттің өміріне үміт сыйлау, сенім ұялату.

«Жұмысым өзіме ұнайды, әлі де үлкен жетістіктерге жетемін деп ойлаймын», – дейді ол.

Медицина – үлкен жауапкершілік, ерекше жанқиярлық пен мейірім талап ететін сала. Медбикелердің еңбегі – нағыз ерлікпен пара-пар. Олар күндіз-түні науқастардың жанынан табылып, үміт сыйлап, ем көрсетіп, өмірлерін сақтап қалады. Сондықтан 8 наурыз қарсаңында осындай абзал жандарға алғыс айтып, еңбектеріне құрмет көрсету – біздің міндетіміз.

Құрметті медбикелер, сіздердің мейірімдеріңіз, шыдамдылықтарыңыз бен кәсібиліктеріңіз – адам өміріне деген қамқорлықтың нағыз үлгісі. Сіздерге денсаулық, қажымас қайрат және әр науқастың алғысына бөлене берулеріңізді тілейміз.

Мерекелеріңіз құтты болсын, ақ халатты періштелер!

Редакция алқасы.