Ауданымыздың Ақжар ауылында жаңа мәдениет үйі пайдалануға берілді. Бұл ғимарат «Ауыл – ел бесігі» деген мемлекеттік бағдарлама аясында тұрғызылған.

Мәдениет үйін салтанатты түрде ашу рәсіміне Алакөл ауданының әкімі А.С.Абдинов, Жетісу облысының мәдениет, архивтер және құжаттама басқармасының басшысы Қ.С.Сүлейменов қатысты.

«Алакөл ауданында 16 мәдениет үйі, 23 кітапхана, 2 музей және 1 архив халыққа үздіксіз қызмет етіп келеді. Міне, бүгінде ауыл жастары үшін 150 орынды жаңа мәдениет үйі бой көтерді. Ауданымызда мәдениет саласының дамуы үшін көптеген игі шаралар жүзеге асырылуда. Мұның өзі болашаққа салынған сенімді инвестиция болып табылады. Алдағы уақытта, Жағатал, Жайпақ ауылдарына блокті-модульдік мәдениет үйін орнатуға бюджеттен қаражат бөлінді», – деп, сүйіншіледі аудан әкімі.

Ақжарқын тілектерден соң, ғимараттың лентасы қиылып, алғашқы концерттік бағдарлама да қойылды.

Нысанның құрылысын Алакөл аудандық құрылыс, сәулет және қала құрылысы бөлімінің тапсырысымен «Global Consrtuction kz» деп аталатын мердігер компания жүргізген. Мәдени ошақ заман талабына сай материалдық техникалық базаларымен жабдықталған. Ғимарат 2 қабатты, аумағы 8000 шаршы метрді құрайды. Сахна залы 150 адамға лайықталған.

Ауыл жастары мен жасөспірімдерінің бос уақыттарын тиімді пайдалануға, дарынды, талантты жастарды қолдауға түрлі іс-шаралар өткізуге мүмкіндік бар. Онда 20-ға жуық үйірмелер (хореография, домбыра, вокал, көркемсөз, сурет) қызмет етіп, 12 штаттық бірлікке сәйкес тұрақты жұмыс орны ашылады деген жоспар бар. Мәдени нысанда оқырмандар үшін ауыл кітапханасы да орналасқан.

А.СҮЛЕЙМЕН.