Өмірбаян

Себепов Асқар Нұрқасымұлы 1968 жылы 2 желтоқсанда Алматы облысы Алакөл ауданы Арқарлы ауылында дүниеге келген.

1985 жылы ауылдық мектепті тәмамдап, 1987-1989 жылдары әскери борышын атқарды.

1990-1998 жылдар аралығында Үшарал жүк тасымалдау мекемесінде жүк көлігін жүргізуші болды.

1998 жылы жеке кәсіпкерлікке ауысып, осы күнге дейін осы салада абыройлы еңбек етіп келеді.

2005-2012 жылдары Қазақстан-Қытай мұнай құбырын тарту ісіне атсалысқан.

2012-2016 жылдары «Азия газ құбыры» компаниясымен Қазақстан-Қытай газ құбырының құрылысына қатысты.

Қазіргі таңда жеке кәсіпкерлікті дамытуға, ауданның ауыл шаруашылығын өркендетуге елеулі үлес қосып отырған кәсіпкер. Сонымен қатар, өңірдегі қайырымдылық шараларына белсенді атсалысып, 2016 жылы «Жыл демеушісі» аталымының жеңімпазы болды. Балалар мен көмекке мұқтаж отбасыларға орасан зор демеушілік танытуда. Қоғамдық өмірдегі атақ-абыройы қалыптасқан, халықтың арасында ыстық ықыласқа ие тұлға.

Сайлауалды бағдарлама

Айдыны тулаған, ақ шағаласы шулаған айбынды Алакөлдің даму потенциалы өте жоғары көрсеткіштерге қол жеткізіп келеді. Алдыңғы толқын ағалардың саналы да сапалы жұмыстарының арқасында ауданның бүгінгісі бұрынғысынан бақуатты, болашағы бүгінгісінен баянды болмақ.

Қазір заман өзгеріп, дәуірдің сұранысы алмасты. Сондықтан да саяси аренаға жаңа ойлай алатын жастарды тарту – заман талабы екендігі мәлім.

Осы ретте аудандық мәслихат депутатығына сайлауға қатысып, ел мүддесіне қарай қызмет қылуды құп көріп, төмендегідей бағдарламамды ұсынамын:

1. Бір қойы егіз туса, бір бетегесінің басы айыр шығатын  мәрт далалы өңіріміздің жақсылыққа жаны құмар жомарт жандарын қайырымдылық қозғалысына ерекше қарқынмен атсалысуына тарту;
2. Болашақ кілтін уыстарында ұстаған жастармен жұмысты жандандырып, олардың өзіндік пікірлері мен пайымдарын білдірулеріне, жұмыспен қамтуға арналған мемлекеттік бағдарламалардың тиімді орындалуына септесу;
3. Білім беру саласына баса назар аударып, кемел келешектің кепілі саналар өскелең ұрпақтың тәлімі мен тәрбиесінің тиісті арнамен қозғалып, қарқынынң арттыруына ықпалдасу;
4. Салауатты өмір салтын насихаттау және өңір халқының спортқа деген құлшынысын оята отырып, спорт үйірмелерін жандандыру;
5. Үшарал қаласының Ж.Жабаев көшесін ағымды жөндеуге, шаһардағы 30-дан астам көшеге түнгі жарық шамдарын орнатуға атсалысамын;
6. Қалада тұрмыстың қатты қалдықтарды өңдейтін шағын кәсіпорын ашуға ықпалдасамын;
7. Қала жастары мен азаматтарының бос уақытын өткізетін мәдени кешен ашуға (жабық бассейн, жастар театры) күш саламын;
8. Қалаішілік маршруттық автобустардың жүруіне үлесімді қосамын;
9. Үшарал қаласындағы көпсалалы колледждің негізгі ғимараты мен жатақханасын 2025 жылы күрделі жөндеуден өткізуге ықпал етемін;
10. Жұрттың денсаулығына баса назар аударып, сапалы медициналық қызмет пен қолжетімділікті қамтамасыз ету;
11. Мемлекет экономикасының тіреуі болып отырған шағын және орта кәсіпкерліктің қанат жаюына, жеке бизнес субъектілеріне көрсетілер көмек пен жеңілдіктердің толыққанды жүзеге асуына және түрлі бағдарламалардың халық мүддесіне қарай қызмет етуіне ықпалдасу;
12. Адамзат баласының бар ғұмырлық тарихы сабақтасып, бүгіні мен болашағы сабақтасқан қоршаған ортаның қалыбына құйылған қалпы болашақ ұрпаққа сақталуына, таңғажайып табиғат байлықтарымыздың эко-туризм бағытында тиімді пайдаланылуына демдесу;

Менің қалауым қуатты Қазақстанның жұрты да шуақты күндерде тірлік тегершігін жұмыла итеріп, ең басты қазына саналар халықтың әлеуетін көтеру.

(Аудандық сайлау қоры тарапынан төленді)