Өңірімізде бұқаралық спорт түрлерінің дамуына, жастардың салауатты өмір салтын ұстануларына талай жылдар бойы ұйытқы болған, еңбек жолында тиянақты, ұқыпты жұмысымен көзге түсіп, талай алғыс, рахмет иеленген атпал азамат, ұлағаты ұстаз Айдарбек Қапасовты еске алу мақсатында аудандық дене шынықтыру және спорт бөлімі мен аудандық білім бөлімінің ұйымдастыруымен ұстаздар арасында воллейболдан турнир өтті.

Шараның ашылу салтанатында аудандық білім бөлімінің басшысы М.Төлеужанов А.Қапасовтың өнегелі өмірі мен үлгі тұтар істері жайлы әңгіме өрбітсе, аудандық дене шынықтыру және спорт бөлімінің басшысы А.Садиев доданың ереже, талаптарымен таныстырып, құрамаларға сәттілік тіледі.

Есімі ұмытылмаған ердің артында қалған үш ұлына ұйымдастырушылар тарапынан сыйлықтар табысталып, ақжарма тілектер айтылды.

Өңіріміздің түкпір-түкпірінен жиналған жиырмаға жуық құрама бір күнге созылған сайыста әдемі ойы өрнегін көрсетіп, көрермендердің ықыласына бөлене білді. Әртүрлі пәннің тізгінін ұстаған ұстаздар қауымы спортта да осал емес екендіктерін алғашқы секундтардан-ақ байқатты.

Соққыларына доп шыдас бермеген командалар өзара «Кім мықтыны?» анықтаған жарыстың қорытындысы бойынша Достық орта мектебі үшінші, Жайпақ аулдық округі, М.Төлебаев атындағы орта мектеп екінші орынның мінберіне көтерілді. Ал қарсылас шақ келтірмеген Үшрал №2 орта мектебінің ойыншылары бас жүлдені қанжығалады.

Тарысты өткен турнирдың жеңімпаздарына ақшалай сыйлық, дипломдар мен медальдар табысталды.

Алмат Есенбеков.