Аудандық мәслихат депутаты А.Есенбеков өңір халқының талап-тілегін тыңдау мақсатында қоғамдық қабылдау өткізді. Шара барысында жастар мәселесі, кәсіпкерлік пен спорт тақырыптары және балық шаруашылығы көтерілді.
Алғашқы болып Жайпақ ауылының тұрғыны Жандос Жиенбаев аталған елді мекендегі спорт алаңын жарықтандыру мәселесін шешіп беруді сұрады. Себебі, ауылдың жастары кешқұрым жұмыстан қолы босап, спортпен айналысуға, доп теуіп, денсаулықтарын шынықтыруға арналған алаң бар. Алайда, түнгі жарықпен қамтамасыз ету ісі әлі де ретке келтірілмеген. Осы мәселені шешу мақсатында арнайы мекемелерге сұраныс жасап, жайпақтық жастардың тілегін қанағаттандыруды мақсат етуде. Бұдан бөлек, Жайпақ ауылындағы бұрынғы әкімдік ғимаратында спорт зал ашуға ниеттеніп отырған азамат бар екен. Ауыл балаларын бокс, күрес үйірмелеріне тартып, жаттығу жасатуға құлшынып отыр. Керегі бапкерлерге арнайы жалақы тағайындау және үйірме жұмысын жандандыру. Бұл мәселені аудандық дене шынықтыру және спорт бөлімінің басшысына жеткізіп, барынша көмек қылуға тырысамыз деді А.Есенбеков.
Артынша Қамысқала ауылындағы балықшылар мұңы тыңдалды. 200-ге жуық балық шаруашылығында жүрген азаматтар бар. Қазіргі таңда «тендер» мәселесін реттеу, жеке кәсіпкерлік ашу сынды тақырыптар төңірегінде түсіндіру жұмыстарын жүргізетін, оқытатын арнайы мамандар қажет болып отыр. Бұл тақырып бойынша облысқа сұраныс жіберіліп, алдағы уақытта бір шешімі шығады деген ойдамыз.