Бүгінгі таңда жоғары оқу орнының деңгейі оның тек ел ішінде емес, халықаралық білім кеңістігінде қаншалықты еркін жұмыс істей алуымен өлшенеді. Осы талап тұрғысынан алғанда, Әл-Фараби атындағы Қазақ ұлттық университеті өз дамуын әлемдік үрдістермен қатар алып келе жатқан заманауи университеттердің бірі болып табылады. ҚазҰУ халықаралық бағытты білім сапасын арттырудың табиғи жалғасы ретінде қарастырады.
ҚазҰУ-дың халықаралық серіктестігі жүйелі әрі мақсатты түрде дамуда. Университет әлемнің түрлі елдеріндегі жоғары оқу орындарымен байланыс орнатып, нақты нәтижеге бағытталған бірлескен бағдарламаларды жүзеге асырып келеді. Студенттер үшін академиялық ұтқырлық бағдарламалары қолжетімді болып, олар шетелдік университеттерде білім алып, жаңа ортада тәжірибе жинақтайды. Бұл жастардың өз мүмкіндігін бағамдап, кәсіби бағытта өсуіне үлкен әсер етеді. Халықаралық байланыс оқытушылар құрамының кәсіби дамуына да тікелей ықпал етеді. ҚазҰУ оқытушылары шетелдік ғылыми орталықтармен бірлесіп зерттеу жүргізіп, халықаралық конференцияларға қатысады. Университетке шақырылған шетелдік профессорлар дәріс оқып, оқыту әдістері мен ғылыми көзқарастарымен бөліседі. Мұндай тәжірибе алмасу оқу үдерісін жандандырып, білім мазмұнын байыта түседі.
ҚазҰУ студенттері халықаралық жобалар мен ғылыми кездесулерге қатысу арқылы өз ойын еркін жеткізуді, пікірін дәлелдеп қорғауды үйренеді. Әртүрлі мәдени ортада жұмыс істеу қабілеті қалыптасып, жаһандық ойлау жүйесі дамиды. Университет үшін халықаралық бағыт – студентті болашаққа дайындаудың нақты құралы.
Әл-Фараби атындағы Қазақ ұлттық университеті – әлемге ашық, сапа мен дамуды басты орынға қоятын білім ордасы. Университеттің халықаралық кеңістіктегі белсенділігі студенттер мен оқытушылар үшін жаңа мүмкіндіктерге жол ашады. ҚазҰУ қалыптастырған ашық білім ортасы – бәсекеге қабілетті, кең ойлайтын мамандарды тәрбиелеудің сенімді негізі.
Авторы:Нұртасқызы Д
Жетекші: Базилова А.А.
Әл-Фараби атындағы ҚазҰУ заң факультетінің қылмыстық құқық,қылмыстық іс жүргізу және криминалистика кафедрасының аға оқытушысы