Қазақстан – көпұлтты ел, мұнда 124 этнос өкілдері өзара бейбітшілік пен келісімде өмір сүруде. Бұл елде әртүрлі мәдениеттер, дәстүрлер мен тілдер үйлесім тауып, барлық азаматтардың тең құқықтары мен еркіндігіне негізделген қоғам құрылды.
Биыл Қазақстан халқы Ассамблеясының 30 жылдық мерейтойы – бұл тек Қазақстан үшін ғана емес, бүкіл әлем үшін этносаралық келісімнің, татулық пен бірліктің маңызын көрсететін мереке. 30 жыл ішінде Қазақстан халқы Ассамблеясы көптеген әлеуметтік және мәдени жобаларды іске асырып, этнос өкілдеріне әлеуметтік көмектер көрсетті. Елімізде ұлтаралық келісім мен татулықтың берік негізі қаланып, Қазақстандағы этнос өкілдерінің мәдениеті мен тіліне құрметпен қарау дәстүрі орнықты. Алакөл өңірінде де 16 ұлт пен ұлыс өкілдері бір шаңырақтың астында тату-тәтті өмір сүруде.
Ауданымызда 2 этномәдени бірлестіктер жұмыс істейді. Атап айтсақ, «Славян» және “Ляйса” татар этно-мәдени орталықтары қоғамдық негізде өз қызметтерін жүзеге асыруда. Этномәдени бірлестіктер қоғамдық өмірге белсене түрде қатысып, қоғамдағы этносаралық келісімді нығайту, мемлекеттік тілді насихаттау, Қазақстан халқының ұлттық мәдениетін, әдеп-ғұрпы мен дәстүрлерін сақтау және дамытумен айналысады.
Бірлестіктер қайырымдылық жұмыстарына да белсенді түрде салысуда. Былтырғы жылы Алакөл ауданы бойынша су тасқынынан зардап шеккен өңірлерге «Жүректен жүрекке», «Күшіміз бірлікте» акциясы аясында 9 тонна гуманитарлық көмектер мен 2 млнға жуық қаржылай көмектер көрсетілді. Оның ішінде, өзге ұлт өкілдерінің де үлесі орасаң зор.
Ауданымыздағы атқарылып жатқандай осы және басқа да шаралар өзге ұлт өкілдерінің әлеуметтік жағдайын жақсартуға, олардың қоғамдағы орны мен рөлін арттыруға бағытталған.
Ассамблеяның күнделікті жұмысы негізінде 2024 жылдан бүгінгі күнге дейін ұлтаралық қақтығыстар орын алған жоқ. Ауданда ұлтаралық жағдай тұрақты.
Ассамблеяның 30 жылдық мерейтойына орай облыс көлемінде «30 жыл бірлік пен келісім» ұранымен кешенді іс-шаралар жоспары қабылданды. Жоспар аясында Алакөл ауданында да өзге ұлт өкілдерімен бірлесе әлеуметтік бағыттағы іс-шаралар ұйымдастырылып, халық назарына ұсынылатын болады.
Алакөл ауданының ішкі саясат, мәдениет, тілдерді дамыту және спорт бөлімінің басшысы Б.Айтахметов