Құбыласынан жаңылып көрмеген қазақ халқы ежелден жетімін жылатпаған, жесірін жерге қаратпаған текті ел. Сол даралар салған сара жолды жалғаған жаңа Қазақстанның жұрты да қайырымдылық, мұқтаж жандарға деген көмектен ешқашан да қашып көрмеген. Айдынды көлді жағалай орналасқан Алакөл халқы да бұл істе көш басынан көрінуде.

Тәсбінің тасындай қатар тізілген алакөлдік мешіт жамағаты бүгінде талай сауапты істерге ұйытқы болып жүр. «Ел үлесі пәтерде» жобасы арқылы жомарт жамағаттың ықпалымен екі көпбалалы анаға баспананың кілті табысталса, енді міне ауданның бас имамы Ә.Молдахметовтың мұрындық болуымен қаржы жиналып, Қазақстанның болашағы саналатын жас ұрпаққа көңілді күн сыйлау мақсатында түрлі іс-шаралар ұйымдстырылды.

Айта кетсек аудандық орталық мешітте алдымен жетім, көпбалалы және аз қамтылған отбасылардан шыққан балаларға иман жайында уағыз айтылып, артынша руханият ордасының алдында түрлі жарыстар ұйымдастырылды. Балаларға тегін тәттілер таратылып, сыйлықтар табысталды. Сонымен қатар бүлдіршіндерді сәнді көліктерге отырғызып, Үшаралдың көрнекті жерлерін аралатып, Астана саябағында демалтып қайтты. Бұл мешіт жамағаттарының атынан жасалған қайырымдылық шараларының бастамасы ғана. Алдағы уақтытта бұл іс өз жалғасын таба бермек.

Н.МАҚСАТҰЛЫ.