Қазақ халқының бағзыдан бері саф алтындай сақталған арда қасиетінің бірі – дәстүрге беріктік, салтқа құрметпен қарау. Бұл үлгілі мінезі жаһандану заманында да дәуір дидарымен үйлесім тауып отырғандығы қуантады.

Бүгін халық қалаулыларының бап пен бақ таласына түсіп, мың жүріктің ішінен шын жүйріктері анықталар күн. Саяси науқанның мемлекеттің құрылысына, мыңжылдықтар төрінен  ұмсына шығып, «Мәңгілік ел» болу мұратымызға жетудің алғашқы қадамдарының бірі. Осындай маңызы ерек, мәні бөлек сәтте Үшарал қаласындағы №45 сайлау учаскесі сайлау мен салтты ұштасыра білгені көңіліміздің қылын дөп шертті.

Ұлтық киімге оранған комиссия мүшелері «Bauyrsaq Party» акциясын ұйымдастырып, тұрғындарды да бір қуантып қойды.

«Алда біздің ғана емес, күллі түркі елінің айтулы мерекесі – Наурыз мейрамы келе жатыр. Салт дәстүр сабақтастығын сайлау науқанында да көрсетуге тырыстық. Ұлттық киімге оранып, 5000 дана бауырсақ пысырып, дауыс беруге келген тұрғындарға төл тағамымыздан ауыз тигізудеміз. Қазір жаңа технологиялар мен жаңашылдықтардың дәуірі болғанымен, біз өзіміздің тарихымызды, өнегелі өткенімізді, әдет-ғұрыптарымыздың ұмытпауымыз қажет. Керісінше, осындай маңызды сәттерде насихаттай түсуіміздің өзектілігі мол»,- дейді, №45 сайлау учаскесі комиссиясы төрағасының орынбасары Рауан Баянбаева.

Аталған учаскідегі белсенділік те жоғары. Ашылған мезеттен дауыс беруге ағылған жұрттың қарасы көп.

А.ХАНЗАДА.