Жуырда аудандық білім бөлімі мен «Алматы облыстық білім және ғылым қызметкерлері кәсіподақ ұйымы» қоғамдық бірлестігі аудандық филиалыныңұйымдастыруымен волейболдан аудандық білім бөлімінің кубогы сарапқа салынды.

Жарыстың салтанатты ашылуы Абай атындағы қазақ орта мектебінде өтіп, жеребе бойынша төрт топқа бөлінген спортшылар Үшарал №1, Үшарал қазақ гимназиясы, С.Иманасов атындағы және Абай атындағы қазақ орта мектептерінде жарысқа түсті. Дүбірлі додаға ауданның білім беру мекемелері қызметкерлеріне барлығы 32 команда қатысты. Тартысты өткен бәсекеде Үшарал №1 орта мектебінің ұжымы ақтық сында қарсыластары С.Иманасов атындағы орта мектебін ұтып, білім бөлімінің ауыспалы кубогын жеңіп алды. Үшінші орынға ардагер ұстаз Б.Шаяхметов бастаған М.Төлебаев атындағы орта мектебінің кәсіподақ мүшелері Достық орта мектебінің командасын жеңіп орналасты.

«Алматы облыстық білім және ғылым қызметкерлері кәсіподақ ұйымы» қоғамдық бірлестігі аудандық филиалының төрағасы К.Алпысбаев жарыста ұстаз деген атқа лайық ерекше ойын өрнегімен, жігерлілігі мен, қарсыластарына деген мейірбандылығымен көзге түскен білім беру мекемелерінің кәсіподақ мүшелерін бағалы сыйлықтармен марапаттады. Үздік төреші атағын Еңбекші орта мектебінің ардагер ұстазы Қазақстан Республикасы Волейбол федерациясының төрешісі Д.Байділдаев және С.Иманасов атындағы орта мектебінің дене шынықтыру пәнінің мұғалімі А.Мұхаметжанов иеленді. Жарыста белсенді ойын көрсеткені үшін Безродных атындағы орта мектептің мұғалімі Д.Ахметолдин, Үшарал қазақ гимназиясының мұғалімі С.Чапаев, М.Төлебаев атындағы орта мектебінің ұстазы Б.Шаяхметов, Достық орта мектебінің мұғалімі А.Туйечинова, Үшарал №2 орта мектебінің мұғалімі Қ.Нұғымыров, Қайнар орта мектебінің мұғалімі Д.Смадияров, Көлбай орта мектебінің мұғалімі А.Китапова, Абай атындағы орта мектебінің мұғалімі К.Нусипов марапатталды.

Өз тілшіміз.