Олар біздің арамызда бар. Қазақстан ТЖМ құтқарушылары — заманымыздың нағыз батырлары. Олар кәдімгі, қарапайым адамдар, экстремалды жағдайларда әрекет ете отырып, өз өмірін ойламай, біреудің өмірін құтқарады.
Аға өрт сөндіруші-құтқарушы Артур Бердашев азаматтық қорғау органдарында 2016 жылдан бері қызмет етеді. Оның кәсібилігі мен ерлігінің жарқын мысалы — 2023 жылғы 17 қазанда Оралда жүргізілген құтқару операциясы.
Сол күні бес қабатты тұрғын үйдің пәтерінде өрт шықты. Оқиға орнына келген өрт сөндірушілер бесінші қабатта қатты түтін мен ашық жануды байқады. Оның ішінде жас балалар бар екені анықталды. Сержант Бердашев жанып жатқан пәтерге кіріп, екі баланы тауып, қауіпсіз аймаққа алып шықты.
Үйлесімді жұмыс пен жеке құрамның, оның ішінде аға өрт сөндіруші-құтқарушы Артур Бердашевтың батыл әрекеттерінің арқасында 15 адам, оның ішінде 5 бала қауіпсіз жерге көшірілді. Өрт көрші пәтерлерге таралуына жол бермей, жедел сөндірілді.
Батырлығы үшін Қазақстан Республикасы Президентінің Жарлығымен Батыс Қазақстан облысы «Өрт сөндіру және авариялық-құтқару жұмыстары қызметі» РММ № 1 мамандандырылған өрт сөндіру бөлімінің аға өрт сөндіруші-құтқарушысы азаматтық қорғау сержанты Артур Бердашев «Ерлігі үшін» медалін алды. Артурдың кәсібилігі, табандылығы мен батылдығы батырлықтың үлгісі, мойындауға және құрметке лайық.
Сұңғат Жүзболсын — маңғыстаулық құтқарушы, азаматтық қорғау органдары жүйесінде 2019 жылдың мамырынан бастап жұмыс істейді.
Өткен жылы Батыс Қазақстан облысындағы су тасқыны кезінде құтқарушылар табиғи апаттың салдарын жоюға, суды бұғаттауға, халықты эвакуациялауға және жағалауды нығайтуға кірісті.
Сұңғат өрт сөндіруші-құтқарушылар тобының құрамында Жайық өзенінің жағалауын бекіту және бөгенді нығайту жұмыстарына белсене қатысты. 22 мамырда ол жолдастарымен Жалғансай ауылына кіреберісте түнгі кезекшілікте болды.
Түн ортасында бөген жарылды. Қауіптің ауқымын сезінген Сұңғат жедел штабпен байланысқа шықты, содан кейін құтқарушылар оқиға туралы әкімдікке хабарлады. Қысқа мерзім ішінде халықты эвакуациялау ұйымдастырылып, бөгенді қалпына келтіру жұмыстары басталды. Құтқарушылардың үйлесімді әрекеттері мен батылдығының арқасында бөген қалпына келтірілді, тұрғындар қауіпсіз жерде болды. Сұңғаттың төтенше жағдайдағы әрекетін батыл деп айтуға болады: ол адам өмірін құтқарып, елді мекеннің орнықтылығын қамтамасыз етіп, батыл әрі жан-тәнімен әрекет етті.
Азаматтық қорғау жүйесінде 20 жылдай қызмет етіп келе жатқан азаматтық қорғау подполковнигі Ертай Құрманбекұлы Райымбеков күн сайын өз ісіне адалдығын дәлелдеп келеді.
Оның қайсарлығының жарқын мысалдарының бірі 2023 жылғы 20 қаңтарда Тараздағы «Ақсай» базарында құтқару операциясы. Өрт кезінде қара түтін айналаны басып, температура қауіпті деңгейге көтерілгенде Ертай газ-түтіннен қорғау қызметінің буынын басқарды. Өз өмірін қауіп-қатерге тігіп, ол және оның командасы жанып жатқан ғимаратқа кірді. Жалыннан Ертай екі әйелді өзі алып шығып, шыға алмайтын жерде қалған мүмкіндігі шектеулі адамды құтқарып қалды. Сонымен қатар 2024 жылы ол Ақмола облысындағы су тасқыны кезінде құтқару операциясына қатысты.
Сол кезде оның басшылығымен 200-ден астам адам эвакуацияланып, суға батқан автокөліктің жүргізушісі құтқарылды. Мұздай суға және денсаулығына қауіп төнгеніне қарамастан, Ертай бейтаныс адамның өмірін сақтап қалу үшін суға өзі секірді. Бұл оның батылдығының тағы бір дәлелі болды.
Қызметтік міндеттерін атқару және адам өмірін құтқару кезінде көрсеткен ерлігі үшін азаматтық қорғау подполковнигі Ертай Құрманбекұлы Райымбеков Бауыржан Момышұлы атындағы ІІ дәрежелі «Айбын» орденімен марапатталды.
«Біздің мамандығымыз әр минутты бағалауға және жылдам әрекет етуге үйретеді, өйткені әр секунд — біреудің өмірі», — дейді подполковник Райымбеков.
Бұл оқиғалар әріптестерімізді ғана емес, әрқайсымызды шабыттандыратын нағыз ерлік үлгісі.
Құтқарушыларды қолдау — адамдардың қауіпсіздігі жолындағы қажырлы еңбегін мойындаудың белгісі. Олардың арқасында біз ең қауіпті және болжауға келмейтін жағдайларда да әрқашан құтқарылуға мүмкіндік және жақсылыққа үміт бар екеніне сенімдіміз.