Елбасы Н.Назарбаевтың ҚР-ның 2020 жылға дейінгі стратегиялық даму жоспары мен Денсаулық бағдарламасы аясында және ауданымыздың 90-жылдық мерейтойына орай Қарабұлақ ауылында заман талабына сай медициналық қажеттіліктермен жабдықталған дәрігерлік амбулатория қолданысқа берілді.

Аталмыш нысанның ащылу салтанатында өңір басшысы Ә.Жақанбаев: «Халықтың әл-ауқаты мен денсаулығын қадағалау – біздің басты міндетіміз. Ауданымызда медицина саласында барлығы 609 қызметкер сапалы қызмет атқарып келеді.

Оның 108-і жоғары санаттағы, 501- орта білімді мамандар. Бүгінгі күні ашылып отырған дәрігерлік амбулатория ел ертеңі үшін жасалған игі бастамалардың бірі. Жобалық құны 113 миллионды құрайтын аталмыш мекемеде 5 қызметкер жұмыс істейді. Жаңа ғимараттың ішінде 8 бөлме бар. Оның әрқайсысы керекті құрал-жабдықтармен, заманға сай жаңа технологиялармен жабдықталған. Бір күнде 25-ке тарта тұтынушыға қол жетімді, сапалы қызмет түрлерін ұсынады», – дей келе медициналық орталықтың лентасын қиды.

Шара барысында жиналғандар қауымы дәрігерлік амбулатория ішін аралап, толықтай танысып шықты. Мекеме қызметкерлері әрбір құрал-жабдықтардың атқаратын қызметтеріне тоқталып, тұрғындар сұрақтарына тұщымды жауап берді.

ТЕМІРЛАН АЙТБАЕВ.