Саналы және салиқалы ұрпақ – мемлекетіміздің мызғымас бөлшегі. «Ағаш түзу өсу үшін оған көшет кезінде көмектесуге болады, ал үлкен ағаш болғанда оны түзете алмайсың» деп бекер айтылмаған. Сондықтан да ұрпақ тәрбиесі ұлтымыз үшін бірінші кезектегі мәселе.

Осы ретте аудандық кітапхана бөлімінің ұйымдастыруымен жастар арасындағы өзекті мәселелерді зерделеу, жат мінез, құқық бұзушылық, тәртіпсіздіктің алдын алу, сондай–ақ, жұмыссыздық мәселелері, мемлекет тарапынан оларға ұсынылған мемлекеттік бағдарламаны түсіндіру мақсатында жастармен кездесу өткізілді.

Үшарал қаласының имамы Р.Мұқашұлы жастарға дінге қатысты бүгінгі таңдағы халықтың өмірінен көптеген мысалдар келтіріп, көптеген өзекті мәселелердің алдын алуға байланысты дұғалар мен аяттарды жаттауға кеңес берді. Бүгінде қаракөз қылықтыларымыз бен боз жігіттеріміздің көбі топ-тобымен жат діннің жетегінде жүргені жасырын еместігін және сондай іс-әрекеттерден аулақ болуды ескертті. Сонымен қатар нашақорлықтан сақ болуды, темекі, ішімдік сияқты зиянды заттарды пайдаланбауға шақырды.

Аудандық кітапхана әдіскері Ж.Омарова: ««Бала тәрбиесі бесіктен» деген халық даналығы бар. Қазақ сөзбен түзеп, көзбен тәрбиелеген. Ұрпағымыз өсіп келе жатқанда қандай тәлім мен өнеге алса, есейгенде соның жемісін көреміз. Мемлекет үшін жастардың орны ерекше. Себебі олар – еліміздің болашағы. Бүгінгі өскелең ұрпақ ертеңгі ел тізгінін ұстайтын азаматтар. Олар әртүрлі салада жұмыс жасап, еліміз бен жеріміз үшін қызмет көрсетіп жатыр»,-деп атап өтті.

Кітапханашы Ә.Күмпейсова білімділік – ислам діні туралы, имандылық туралы түсінік беру, жастардың ойлау қабілетін шыңдау, адамгершілікке, ұлтжандылыққа тәрбиелеу туралы баяндама оқыды.

Артынша қатысушылар тарапынан аталған мәселеге байланысты түрлі сауалдар қойылып, тұщымды жауаптар алынды.

М.НҰРҚАСЫМОВА.