Қазақ жігіттері қай замандарда да сөзіне шаң жұқпаған шешендігімен, алдына жан шықпаған көсемдігімен, мың жауға жалғыз шабар батырлығымен, мың дауға шешім табар ақылдығымен танылып, өзгелердің үлгі тұтар тұлғаларына да айналды. Оған қытай, орыс, моңғол, грек қолжазбаларында кездесетін деректер дәлел бола алады. Көбіне «Олар ат құлағында ойнаған шабандоздар, дұшпандарынан қаймықпайтын қаһармандар, ағаш-темірден түйін түйетін шеберлер, сөйлеп тұрғандарының өзі ән айтқандай әсерге түсіретін өнерлі де еңбекқор азаматтар» деген мәліметтерді табуға болады.

Баһадүр бабаларының ізін басуға балалары лайықты ма? Міне осы сауалға жауап іздеген аудандық ішкі саясат бөлімі мен аудандық жастар ресурстық орталығы «Жігіт сұлтаны -2017» байқауын жариялады.
Еңбекші және Жанама ауылдық округтерінің әкімдері А.Тоқтабаев пен Т.Байзақовтың және қос елді мекеннің жастар ісі жөніндегі әдіскер нұсқаушыларының ұйытқы болуымен өткен доданың басты мақсаты Ұлы дала елін ұлылыққа жетелеген Елбасымыз Н.Назарбаевтың «Болашаққа бағдар: рухани жаңғыру» атты мақаласын дәріптеу, насихаттау болды.

Шараның ашылу салтанында аудандық ішкі саясат бөлімінің басшысы М.Сүлейменов, аудандық жастар ресурстық орталығының жетекшісі А.Арнай, Еңбекші ауылдық округі әкімі аппаратының бас маманы Қ.Сағымбеков бүгінгі күннің өзекті тақырыбына айналған Мемлекет басшысының мақаласы жайлы ой қозғап, шапқалы келген саңлақтарға сәттілік тіледі.

Таныстыру, сұрақ-жауап, өз өнерін және спортқа деген ептілігін көрсету сынды сынақтардан сүрінбей өткен серілер барларын салып, нағыз қазақ жігітінің қандай болу керектігінің жарқын үлгісін паш етті.
Байқаудың қорытындысы бойынша АГТК білімгері Даулетбай Мұхаметбай үшінші, ынталылық Жеңісхан Бадырай екінші орынның мінберіне көтерілді. «Әке тұрып ұл сөйлесе ержеткені болар» демекші аламан бәйгенің алдын бермеген 18 жастағы еңбекшілік Ернат Құдайберген «Жігіттің сұлтаны» атағын жеңіп алды.
Жарыс жүлдегерлеріне дипломдар мен бағалы сыйлықтар табысталды.

АЛМАТ ЕСЕНБЕКОВ.