Қазіргі күніне қырық құбылған қоғамда ер мен әйелдің дәрежесін тең ұстап, нәзік жандыларға қолдау көрсету мәселесі күн тәртібінен түскен емес. Әсіресе, кәсіпкерлік саласын дөңгелетуде әйелдерге барынша ықпалдасудың да маңыздылығы артып келеді.
Осы ретте халықтың пікір-сұранысын ескере келе «Атамекен» кәсіпкерлер палатасының ұйытқы болуымен Үшарал қалалық әкімдігінің мәжіліс залында арнайы жиын ұйымдастырылды.
Аталған шараға облыстық іскер әйелдер кеңесінің төрайымы, облыстық мәслихат депутаты Римма Аджарқызы, облыстық кәсіпкерлік және индустриялық-инновациялық даму басқармасының бас маманы Асхат Кәрібаев, облыстық іскер әйелдер кеңесі төрайымының орынбасары, әйелдер кәсіпкерлігін дамыту орталығының менторы Светлана Серікбай, облыстық кәсіпкерлер палатасысының адами капиталды дамыту бөлімінің сарапшысы Айдын Амангелдіұлы, Отбасы банктің көшбасшы кеңесшісі Данияр Қайратұлы, кеңесшісі Бауыржан Ерланұлы, әйелдер кәсіпкерлігін дамыту орталығының кеңесшісі Мадина Төлеуқызы, Көксу аудандық іскер әйелдер кеңесінің төрайымы Салтанат Мұхаметханқызы, облыстық мәслихат депутаты Баршагүл Саятова қатысты.
Барлық тұлғалар әйелдер мен көпбалалы, жалғызбасты аналарға кәсіпті бастау жолдары, тиімді шешімдер, оңтайлы қадамдар, мемлекеттік бағдарламалар мен гранттар, жеңілдіктер мен банк тарапынан ұсынылар мүмкіндіктер туралы көптеген мәліметтер берді. Бәсекелестік өршіген уақытта өзінің тиімді ісін ашып, ұршығын икемді иірген әйел азаматтар жетерлік. Олардың барлығы да кішкентай дүниеден бастап, үлкен белестердің биігіне шығып отыр. Сондықтан да саяси сауатты болып, мүмкіндіктердің шекпенінен ұстап үлгерсе көптеген дүниеге қол жеткізбек. Ал сол мүмкіндіктерді ашып, түсіндіру мақсатында аудандық іскер әйелдер кеңесінің өңірімізде осындай шараны ұйымдастыруы аса маңызды.
Алдағы уақытта да осы іспеттес бастамалар өз жалғасын таба бермек.

А.МУСЛИМ.