Қара жердің арқасы босап, күллі табиғат атаулы кеңінен тыныс ала бастаған көктем мезгілінің ажырамас бөлігі саналатын көшет отырғызу және тазалық жұмыстары ауданымызда қарқынды түрде жүзеге асуда. Оған көзіміз үйренгендей қарапайым халық қана емес, қолына күрек, тырмасын ұстап, қызу жұмысқа кіріскен билік басындағылар да атсалысуда.

Жуырда аудан әкімі Ә.Жақанбаев бастаған бөлім, мекеме басшылары, мектеп директорлары мен колледж білімгерлері, белсенді жастар Үшарал қаласына кіре берісте ораласқан бұлақтың айналасын тазалап, бірінші жұтымынан-ақ таңдайды қарып өтер судан дәм татты.

Аудандық жастар ресурстық орталығының ұйытқы болуымен түңлігін түрген «Бұлақ көрсең көзін аш» атты бұл шарада аудан әкімі де қолына күрек, тырмасын алып, іске кірісті. Бұлақтың айналасын толықтай күл-қостан арылтып, «Жастар» аллеясына қарай аттанды. Ол жерде Үшарал қалалық округі әкімдігінің мұрындық болуымен көктемгі көшет отырғызу  рәсімі өтті. Дулепов көшесін бойлай орналасқан саябақты көгалдандыру ісінде беленділік танытып, балаларға арналған бөлігіне қарағай көшетін отырғызған аудан әкімі: «Бүгін бұл жерге егілген әр ағаштың өз баптаушы болады. Мысалы, мына мен отырғызған көшеттің арғы күтіміне өзім жауаптымын. Сол секілді әркім көшеттің өсіп, жетілуін қадағалайтын болады. Бұл атқарылар істің алғашқы қаса. Бұдан бөлек қаланы және ауылдарды көгалдандыру ісі жүйелі түрде жалғаса бермек. Игілікті іске аудан жастарын көптеп тартып, оларды табиғатты аялауға, қоршаған ортаны қадірлей білуге үйретсек нұр үстіне нұр болатын еді»,- деп, бұл бастамадан барлығы да үлгі алып, жалғасын тапса деген ниетін білдірді.

А.АСХАТҰЛЫ.