Бүгінгі күнніңбасты тақырыбына айналған мәселенің бірі – қазақ тілін латын әліпбиіне көшіру. Елбасымыз Жолдауында: «Латыншаға көшудің терең логикасы бар. Бұл қазіргі заманғы технологиялық ортаның, коммуникацияның, сондай-ақ ХХІ ғасырдағы ғылыми және білім беру процесінің ерекшеліктеріне байланысты»,- деп атап өткен болатын. Осы орайда  2484 әскери бөлімінің мәжіліс залында азаматтар арасында мемлекеттік тілге деген құрметін арттыру, латын әліпбиін қолдау, кеңінен түсіндіру мақсатында аудандық мәдениет және тілдерді дамыту бөлімінің ұйымдастыруымен «Ұлт мұрасы: тіл, тұлға, тағылым» атты аудандық семинар өтті.

Аталмыш жиынға 2484 әскери бөлімі, ішкі саясат және білім бөлімінің қызметкерлері қатысты.

Аудандық мәдениет және тілдерді дамыту бөлімінің басшысы Г.Жексембаева Елбасының «Болашаққа бағдар: рухани жаңғыру» мақаласында көтерілгендей қазақ әліпбиі біртіндеп латын қарпіне көшірілетінін айтып, оның әрбір кезеңіне жеке-жеке тоқталып өтті.

Аудандық ішкі саясат бөлімінің басшысы М.Сүлейменов латын әліпбиіне ауысу заман талабы екенін тілге тиек етіп, жуырда жарияланған Елбасы Жолдауын хақында да түсіндіру жұмысын жүргізді.

Бұлақты орта мектебінің қазақ тілі мен әдебиеті пәнінің мұғалімі Ж.Аянбаева өз баяндамасында: «Жаңа әліпбидің ең үлкен артықшылығы – мемлекеттік тіліміз ендігі кезеккте ғылым мен білімге, компьютер мен интернетке тіпті де оңтайлана түседі.Латын әліпбиіне көшу  – еліміздің алға қадам басуы, заман талабына сәйкес көш басынан қалмай өркендеуімізге себепші болары сөзсіз»,-деп атап өтті.

Шара соңында қатысушылардың пікірін білу мақсатында сауалнама жүргізіліп, үлестірме қағаздары таратылды.

М.НҰРҚАСЫМОВА.