Өмір әр адамды әрқалай сынайды. Бірін байлықпен, бірін баламен, бірін денсаулықпен. Шыдай білгенге бақ қонады, төзе білгенге Тәңірдің де өзіндік сыйы болатыны рас.

Бір қуантарлығы, қазіргі таңда мүмкіндігі шектелген азаматтарға мемлекеттің де, қоғамның да көзқарасы оң бағытқа бұрылып келеді. Ерекше күтімді қажет ететіндерге жасалар жағдай да, көрсетілер көмек көлемі де жыл сайын ұлғаюда.

Жуырда Алакөл аудандық орталық ауруханасында мүмкіндігі шектеулі балалар мен оларға қамқор ата-аналармен кезекті кездесу өтті. 

Аталған шараның басты мақсаты балаларға жылы көңіл-күй сыйлау,олардың ата-аналарына емдік шараларды, әртүрлі жағдайларда көрсетілер алғашқы көмектер, қажетті жаттығуларды жасау жолдары  мен тиімді тәсілдерін көрсету әрі дағдыландыру болды.

Бұндай жиындар өз кезегінде балалардың қоғамға бейімделуіне, ата-аналарының емдеу жұмыстарына белсенді араласуына өзіндік септігін тигізіп отыр. Себебі, білікті мамандар қажетті шараларды ретімен түсіндіріп, барынша үйретуде. Соның арқасында әр бүлдіршінге бақытты балалық шақ сыйлауға мүмкіндігіміз бар.

Кездесу соңында ата-аналар тарапынан жылы лебіздер мен тілектер айтылып, дәрігерлер жұмысына сәттілік жұғысты болсын деген ниеттерін жеткізді. Аталған шаралар алдағы уақытта да үздіксіз ұйымдастырыла бермек.

Аудандық орталық аурухананың баспасөз қызметі.