Жастар елдің ертеңі, мемлекет болашағының негізі екендігі рас. Сондықтан да олардың жалынға толы жастық шағында барынша қолдау көрсетіп, дұрыс бағытта тәрбиелеу, дамыту, көшбасшылық қасиеттерін өрістету, бәсекеге лайықты болуға баулу – басты мақсаттардың қатарында.

Осы ретте Жетісу облысының жастарының бойындағы көшбасшылық қасиетті дамыту ниетінде облыстық қоғамдық даму басқармасы мен «Jetisu jastary» КММ ұйымдастыруымен «Жетісу облысында студенттік және мектептік өзін-өзі басқаруды дамыту жөніндегі іс-шаралар кешені» жобасы аясында Ақши ауылындағы «Жалын» кешенінде «Жазғы лагер»  өтті.

Шараның ашылу салтанатында облыстық қоғамдық даму басқармасының бас маманы Жанерке Бейбітқызы, облыстық мәслихат депутаты Алмат Садиев, «Алакөл» аудандық газетінің бас редакторы Алмат Есенбеков, «Жетісу жастары» КММ директорының орынбасары арнай Байжұрынов сөз сөйлеп, лагерьдің маңыздылығын, жастардың мемлекет болашағы үшін өзектілігін тілге тиек етіп, жиналғандарды құттықтап кетті.

Жоба барысында Жетісу облысының барлық жоғары, арнаулы, орта оқу орындарында студенттік және мектептік өзін-өзі басқарудың тиімді моделін құру және оның тұрақты жұмыс істеуін қамтамасыз ету дағдылары қалыптасты.

Сонымен қатар, студенттер мен оқушылардың қоғамдық-саяси өзгерістерге және елдің жарқын болашағына оң көзқарасын қалыптастыру мен жастар арасында шығармашылық қызығушылықтарын, өз ойын еркін білдірулерін, тәжірибе алмасу және белсенділік деңгейін арттыру бойынша ақпараттық-насихат жұмыстары жүргізілді.

 Шара қатысушыларына арнайы әзірленген бас киім, футболка, папка, қалам, блокнот жабдықтары таратылды. Сондай-ақ, әртүрлі маңызды тақырыптар бойынша 6 спикер 3 күндік семинар-тренинг өткізді. Атап айтсақ, «Психология. Көшбасшылық әдіс бағыты» тақырыбында Жетісу облысы әдістемелік орталығының әдіскері, психолог – Талшын Жанабекова, «Қаржылық сауаттылықты арттыру бағыты» тақырыбында «Қарызсыз қоғам» жобасының директоры, эксперт – Замзагүл Сламбекова, «Шешендік өнер мен сөз саптау бағыты» тақырыбында – шешендік өнер мен сөз саптау бағыты бойынша коуч – тренер – Ержан Дәулетбаев және «Кәсіптік бағдар беру бағыты» тақырыбында – профориентолог – Назар Жарасұлы сабақ өткізді.

Шара соңында оқушылардың семинарға қатысқандығын растайтын арнайы сертификаттар мен мадақтама қағаздары таратылды.

Алакөл ақпарат.