Несі бар, айлап аузымыздан түспеген, құлағымызда ұран боп қалған референдум күні де келді. Таңғы жетіден әр сайлау учаскесінде ән қойылып, бақылаушылар мен комиссия мүшелері орындарында сақадай сай отыр.

Таңдау құқы барлығымызға да берілген. Аудандағы 54 сайлау учаскесіне 45 мыңға жуық адам тіркелген. Олардың қаншасы келіп, қаншасы немқұрайлылық танытатыны да белгісіз. Алайда, өз сайлау учаскемдегі белсенділікті көріп, көңілім бір жібігендей. Ғасырлық ғұмырға таяған ақсақалдар мен әжелер, кеше ғана 18-ге толған ұл-қыздар, еңбек ұжымдары, әулетімен бірге келген жанұялар… Барлығы да Ата заңға енер өзгерістердің ел өміріне де тың леп әкелетіне сенімді.

Біздің де қалауымыз сол. Жастар өкілі ретінде ертеңгі күн өзімізге тиесілі болғандықтан бүгіннен бастап қам қылғанымыз дұрыс.

Референдум арқылы жалпы қазақстандықтар өздерінің ой-пікірлерін сараптай келе, тың өзгерістерге дайындығын дәлелдей алды. Яғни, өзінің, туған-туыстарының кемел келешегі үшін дауыс береді. Соны ұмытпағанымыз абзал.

Жалпы алғанда өңірімізде жақсы белсенділік байқалады. Таң рауанымен таласа келген сайлаушылардың қарасы әлі үзілмеуде. Бұл қуанарлық жайт. Жаңа Қазақстанды құруда біріге атсалыса берейік. Болашақ өз қолымызда.

Алмат ЕСЕНБЕКОВ,

Аудандық мәслихат депутаты, аудандық «Алакөл» газетінің бас редакторы.