Ұлтымыздың ұлық мерекелерінің қатарын толықтырып, мерей-мәртебеміздің көтеріп отырған Республика күні қарсаңында облыс көлемінбе бір мезетте марафон ұйымдастырылған болатын. Шараның басты мақсаты Республика күнінің құндылықтарын түсіндіру, салауатты өмір салтын насихаттау, ұлттық идеологияны дамыту және мерекелік көңіл күй сыйлау болды.
Аталған шара негізінде орталық «Сымбат» стадионында аудандық бұқаралық спорттық іс-шараларды ұйымдастыру ортылығының ұйытқы болуымен өңірімізде де ізгілікті шара түңлігін түрді.
Доданың ашылу салтанатында «AMANAT» партиясы аудандық филиалының төрағасы Қайрат Көкебаев сөз алып, мерейлі мерекенің маңыздылығын түсіндіре келіп: «Мың жылдықтар төрінен тамыр тартып, «Мәңгілік ел» болу мұратына қарай көш түзеген қазақ елінің өткеніне үңілсек небір зобалаңдарды көреміз. Ұлт ретінде жойылып кетуге шақ қалған тағдыршешті сәттерде аман қалып, ақыры азаттығына қол жеткізген еліміз бүгінде егемендігімен еңселі, тәуелсіздігімен тұғырлы. Бұл жолда бабалар қаны төгілді, жаны сөгілді. Алайда, тарихтың небір солқылдақ өткелінде өжеттік танытып, бүгінгі дәреженің дәрегейіне шығып отырмыз»,- дей келе, жиналғандарды мерекемен құттықтап, жарысқа қатысушыларға сәттілік тіледі.
Аудандық бұқаралық-спорттық іс-шараларды ұйымдастыру орталығының директоры Ердос Нөсерханов спорттың мәні мен маңыздылығын тілге тиек етіп, ұлттық мереке мәртебесі өсе берсін деген тілегін жеткізді.
Жарыс төрешісі Д.Шарииғатов сайстың ережесімен таныстырып, жүйріктерді сапқа тізді.
6 шақырымға созылған жүйріктер бәйгесі екі жас айырмашылығы бойынша өтті.
Қорытындыға келсек, 17-40 жас аралығында К.Умбетаев бірінші, А.Балабатыров екінші, Е.Қанат үшінші орынның мінберіне көтерілді.
40 жастан асқан санатта Е.Машаев алтын, Д.Төлегенов күміс, Д.Шариғатов қола медальді тағынды.
Жүлдегерлерге арнайы диплом, медаль, ақшалай сыйлық пен «Тарлан» спорт кешеніне жылдық жолдамалар берілді.

А.ЕСЕНБЕКОВ.