«Ақиқатты айқындап жариялар,

Бара жатыр азайып қариялар»,- деп мұзбалақ ақын Мұқағали толғанғандай, бүгінде қазына кеуде, кенді ойлы қарияларымыздың қатары сиреуде. Уақыт шіркінге қарсы қояр амал жоқ. Сондықтан да көнбеске шара бар ма?

Алайда өткеніне өнеге тұнған, бүгіні берекелі қарттарымыз да жетерлік. Олар жас ұрпақтың тәрбиесіне атсалысып, рухани құндылықтар мен ұлттық тәлім беруде аянып қалмауда. Бұл рухани жаңғыру даңғылына түскен Қазақстанның болашағы үшін ұтымды дүние болмақ.

Дария кеуде қарттарды құрмет төріне шығаруда аудан әкімі Ә.Жақанбаев көш бастап келеді. Өңір басшысының ықпалымен Алакөл жерінде қарияларға мемлекет тарапынан көптеген жеңілдіктер мен көмек көздері ұсынылған.

Жыл сайын Халықаралық қарттар күні қарсаңында аудан әкімінің ұйытқы болуымен өңіріміздің бүгінгі бедел биігіне шығауына елеулі үлес қосқан, талай жылғы қалтқысыз қызметтерінің бұқараның алғысын иемденіп жүрген  ақсақалдар мен ақ жаулықты әжелерімізге мерекелік дастархан жайылып, алдарына ас қойылады.

Биыл да дәстүрден жаңылмаған өңір басшысы бергенінен берері көп қариялардың басын қосып, ақ баталарын алды.

Мейрам құрметіне жайылған ақ дастарханда алғы сөз алған аудан әкімі Ә.Жақанбаев қатарлары сиреген қарттарды айтулы күнмен құттықтап, олардың қоғамдағы орны жайлы әңгіме өрбітті.

Келесі кезекте аудандық ардагерлер кеңесінің төрағасы С.Байбазаров, аудандық қоғамдық кеңестің төрағасы О.Мұхаметқалиев, облыстың Құрметті азамата, еңбек ардагері М.Жолжанов ізгі ниеттерін ағытты.

Артынша әр округтің ардагерлер кеңесі төрағалары, белді, беделді ақсақалдар сөз алып, ақ тілектерін ақтарды.

Н.ЮСУПБАЕВ.