Табиғатты қорғау, оны болашақ ұрпаққа қалыбына құйылған қалпы табыстау бізге жүктелген маңызды міндеттердің бірі. Себебі қоршаған орта мен адам өмірі сабақтас,  бірін бірінен ажыратып алуға болмайтын дүние. Ал табиғатты қорғау, орман алқаптарын аман сақтау, сол арқылы жан-жанауарлар дүниесінің құрып кетпеуіне ықпал ету – орманшылардың иығына түскен жүк.

Аталмыш мамандық иелерінің төл мерекесіне орай аудан әкімдігінің үлкен мәжіліс залында кездесу ұйымдастырылып, оны өңір басшысының орынбасары А.Чалкенов ашып, жүргізді.

Сөз алған Алакөл орман шаруашылығының директоры Ғ.Жақанбаев жыл бойына атқарылған жұмыстарын қорытындылап, таусылмас табиғи байлық саналатын орман алқаптарының көркеюіне ұйытқы болып жүрген әріптестерін мерекемен құттықтады. Олардың елеулі еңбектеріне ырыс, толайым табыс тілеп, өз ісімен көзге түсіп жүрген қызметкерлерді атап өтті.

Келесі болып мінберге көтерілген облыстық табиғи ресурстар және табиғатты пайдалануды реттеу басқармасының маманы С.Илиясұлы табиғаттың тамыры бекіп, тал-терек болып көтерілген ормандардың сақталуына, кеңінен қанат жаюына ықпал ететін орманшылардың еңбегін атап өтті.

Жиынды қорытындылаған аудан әкімінің орынбасары А.Чалкенов орман байлығын орынсыз пайдаланудан сақтап, әр ағаштың да өсіп-өнуін назардан тыс қалырмайтын орманшыларға алғыс білдіріп, төрден орын алған төл мерекелерімен құттықтады.

Сондай-ақ кездесу барысында тыңғылық ісімен, жауапкершілі және ұқыптылығымен, кәсібилігімен көзге түскен орманшыларға арнайы марапттар табысталды.

А.ЕСЕНБЕКОВ.