«Жаңа гуманитарлық білім. Қазақ тіліндегі 100 жаңа оқулық» жобасы аясында аударылған кітаптар биылғы оқу жылынан бастап білім бағдарламасына енгізіледі. Бұл туралы ҚР Президенті Нұрсұлтан Назарбаев алғашқы 18 кітаптың тұсаукесерінде мәлімдеді, деп хабарлайды Baq.kz тілшісі. 

«100 жаңа оқулық» жобасы бойынша Үкімет Ұлттық аударма бюросына бірқатар нақты тапсырма беруі қажет. Біріншіден, 2018 жылға бекітілетін 30 кітапты сапалы аударып, басып шығару керек. Аудармашыларға жұмыс әлі толып жатыр. Оған қаржы уақытылы бөлініп, одан кейінгі жылдарда қолға алынатын оқулықтар дер кезінде іріктеліп, сарапталуы керек», — деді мемлекет басшысы. 

Екіншіден, Президент аударылған оқулықтарды білім жүйесіне тиімді енгізу ең маңызды міндет екенін атап өтті. 

«Жастар оларды бірте-бірте оқи бастауы қажет. Алдағы оқу жылынан бастап осы оқулықтармен оқытылатын пәндер білім беру бағдарламасына енгізілсін. Үшіншіден, қолданысқа енген терминдерді жинақтап, гуманитарлық-экономикалық лексиканың түсіндірме сөздігін шығаруды жүктеймін. Төртіншіден, оқулықтарды кәдімгі кітап түрінде шығару, әрине, керек. Сонымен бірге цифрлық негізде, онлайн білім беруді дамытуға тиіспіз. Қазақстанның ашық университеті жан-жақты қолдауға ие болуы керек. Оқулықтардың негізінде дайындалатын ашық лекциялар видеотекасының сапасына баса мән беріп, қадағалайық», — деді Нұрсұлтан Назарбаев. 

Ол бесінші міндет ретінде «100 жаңа оқулық» жобасының ғылыми аударма мектебін дамыту үшін маңызды екенін және аудармалар аясындағы тәжірибе, білік, кәсіби дағдыларды жүйелеп, дамыта түсу қажет екенін айтты. Президент бұл міндеттердің бәрін сапалы іске асыруға Білім және ғылым министрлігі жауапты деп, ал жалпы жұмысты үйлестіруді Үкіметке тапсырды. 

Назерке Абибулла
 

Мақала Baq.kz интернет порталынан алынды. 

https://baq.kz/kk/news/prezident/nazarabaev_audarilgan_okuliktardi_biildan_bastap_oku_bagdarlamasina_engizudi_tapsirdi_20180412_152800