Жуырда Жетісу өңірінің орталығы Талдықорған қаласында көктемнің алғашқы мерекесі Алғыс айту күніне орай облыстық жастар саясаты мәселелері жөніндегі басқармасының ұйымдастыруымен келелі кездесу өткен болатын. Аталған шарада көпбалалы обасыларға құрмет көрсетіліп, облыс әкімі А.Баталовтың марапаты ұсынылды.

Игілікті жиынға ауданымыздан төрт баланы дүниеге әкеліп, тәлімді тәрбиенің уызына жарытып отырған Хусиновтар отбасы барып қайтты. Отағасы Нұрбақыт Меңдібайұлы мен шаңырағының ұйытқысы болып отырған жас ана Құралай Жақсылыққызы төрт перзетімен бірге көпбалалы жанұялардың құрметіне ұйымдастырылған түрлі іс-шаралардан керемет әсер алғандарын айтады. Сондай-ақ жас отбасы арнайы Алғыс хат, ақшалай сыйлықпен марапатталып, айдынды ауданымыздың абыройын арттырды.

Ынтамаққа ұйыған жанұның үлкен ұлы Нұршуақ екінші сыныпта оқыса, еркелері Шұғыла бес, тентектері Рамазан үш жаста. Ал кенжелері Асылжанға әлі алты ай да болып үлгермеді. Жас ана төрт сәбимен шектеліп қалмайтынын, бұрынғы алтын құрсақты ана, әз әжелердің жолын қуып, Тәңір берсе әлі де талай баланы дүниеге әкелетінін жасырмады.

Біз де өз тарапымыздан Хусиновтар әулетіне берекелі, мерекелі тірлік, бақытты, баянды өмір тілемекпіз. Үбірлі-шүбірлі ғұмыр кешіп, еліміздің даму жолында аянып қалмаңыздар.

А.ЕСЕНБЕКОВ.