Құбыласынан жаңылып көрмеген күллі мұсылман қауымының ұлық мейрамы «Құрбан айт» биыл өңірімізде ерекше қарқында аталып өтті. Олай деуімізге таңғы айт намазына ауданымыздағы 26 мешіт жамағатқа лық толып, 10 мыңнан астам адамның бір сапта тәсбінің тасындай тізіле тұруы дәлел бола алады. Бұл тек Алла үйлерінің сыйымдылығы ғана екендігін ескертіп кеткініміз келеді. Бұдан бөлек руханият ордаларының ауласында тұрып намазға жығылған бұқараның қарасында есеп болмады.

Исламға иланған жұрттың төрден орын алған төре мерекесімен құттықтау үшін аудан әкімі Ә.Жақанбаев орталық мешітке арнайы ат басын бұрды. Жамағатпен қосыла жайнамазға маңдайын сүйдіріп, мұсылман қауымының парыздарының бірін өтеді.

Сондай-ақ аудандық ардагерлер кеңесінің төрағасы С.Байбазаров қасиетті мейрамның маңыздылығы мен өзектілігіне тоқталып, ақжарма тілегін де ақтарды.

Артынша құран оқылып, дін шарттары бойынша құрбандық шалынып, дұға тіленді.

Бір айта кетерлігі аудан мешіттерінде алғашқы күні онға жуық ірі қара мен алпыс шақты ұсақ малдың еті 360-тан астам отбасыға таратылып, сауапты іс өңірімізде кең көлемде қолдау тапты.

А.АСХАТҰЛЫ.