Елбасымыз Н.Назарбаевтың болашағымыздың бағытын айқындап, ұлт тірлігіне тарихи төңкеріс әкелген бағдарламалық мақаласының аясында облыстық дін істері басқармасының бастауымен Тәңірдің рақымы жауған жер жәннаты Жетісу өлкесін аралау мақсатында «Рухани керуен» жолға шыққан болатын. Әр саланың жілігін шағып, майын ішкен майталман мамандардан құралған топ жерұйық атанған жомарт даласы бар айдынды Алакөлге де ат басын тіреді.

Алқалы топтың сапары Ұлы Отан соғысында қаза тапқан жауынгерлерге арналған мемориал мен текті жұртымыздың біртуар азаматы Д.Қонаетың ескерткішіне гүл шоқтарын қоюдан басталды.

Артынша аудан әкімдігінің үлкен мәжіліс залында мекеме, бөлім басшыларының, ауыл әкімдерінің, мектеп директорлары мен дінтану пәні ұстаздарының басын қосқан айтулы жиын өтті.

Аталмыш кездесуге аудан әкімінің орынбасары А.Абдинов төрағалық етті.

Алғашқы болып мінберге көтерілген облыстық дін істері басқармасының басшысы Р.Есдаулетов өңіріміздегі діни ахуалдың тұрақтылығына, конфессияаралық қатынастардың бірқалыптылығына баса назар аударып, оң бағасын берді.

Келесі болып сөз тізгінін алған сазгер, адуынды ақын Қ.Тәлімов, облыстық «Жетісу» газеті бас редакторының орынбасары Ж.Әміреев, дінтанушы-заңгер Т.Нүсіпханов, жыршы, термеші Ә.Әділбеков және аудандық аналар кеңесінің төрайымы Ұ.Дүйсебаева Ұлт көшбасшысының мақаласы, мәдениет, өнер, әдебиет жайлы тұщымды ойларын ортаға салды.

Қазақ тілінің қаймақты сөздерімен елді еліткен меймандарға Көлбай ауылдық округінің әкімі Е.Шакеров жалынды жырын арнап, алакөлдік азаматтар да осал емес екендігін көрсетті.

АЛМАТ ЕСЕНБЕКОВ.